CSK vs KKR: धोनी सलग पाचव्या सामन्यात अनुपस्थित! आयपीएल इतिहासात पहिल्यांदाच घडली ही मोठी गोष्ट!

आयपीएल (IPL) 2026 स्पर्धेमध्ये स्टार फलंदाज एमएस धोनीची (M.S Dhoni) अनुपस्थिती सध्या चर्चेचा विषय ठरत आहे. चेन्नई सुपर किंग्सच्या (CSK) या दिग्गज खेळाडूने पुन्हा एकदा एक सामना मिस केला आहे. विशेष म्हणजे, आयपीएलच्या इतिहासात असे पहिल्यांदाच घडले आहे की धोनी कोलकाता नाईट रायडर्स (KKR) विरुद्धच्या सामन्यात खेळण्यासाठी मैदानात उतरला नाही.

या 22 व्या सामन्यापूर्वी, IPL इतिहासात दोन्ही संघ 32 वेळा एकमेकांसमोर आले होते आणि त्या सर्व सामन्यांमध्ये धोनी खेळला होता. मात्र, पहिल्यांदाच धोनी केकेआर विरुद्ध चेन्नईच्या प्लेइंग इलेव्हनचा भाग नाही. चेन्नईच्या एम.ए. चिदंबरम स्टेडियमवर खेळल्या जाणाऱ्या या सामन्यात धोनी सलग पाचव्यांदा संघाबाहेर आहे. संघ आधीच खराब फॉर्मशी झुंजत असताना त्याच्या अनुपस्थितीने चाहत्यांची निराशा केली आहे. KKR चा कर्णधार अजिंक्य रहाणेने टॉस जिंकून प्रथम गोलंदाजीचा निर्णय घेतला होता.

दोन्ही संघ सध्या पॉइंट्स टेबलमध्ये खालच्या स्थानावर असून, पहिल्या चार सामन्यांपैकी प्रत्येकी तीन सामने हरले आहेत. त्यामुळे हा सामना दोघांसाठीही अत्यंत महत्त्वाचा आहे. कोलकाताने वरुण चक्रवर्तीला संघात स्थान दिले आहे, तर चेन्नईने कोणताही बदल न करता मैदानात उतरण्याचा निर्णय घेतला आहे. धोनी या सीझनमध्ये अद्याप एकही सामना खेळू शकलेला नाही; याचे मुख्य कारण त्याची दुखापत असल्याचे सांगितले जात आहे. चाहत्यांना अजूनही आशा आहे की ‘कॅप्टन कूल’ लवकरच पुनरागमन करेल, पण सध्या त्याच्या पुनरागमनाबाबत सस्पेन्स कायम आहे.