अमरनाथची पहिली पूजा 'हर हर महादेव'च्या गजरात झाली.

मुख्य यात्रा 3 जुलैपासून सुरू होणार

वृत्तसंस्था/ अमरनाथ

जम्मू आणि काश्मीरचे उपराज्यपाल मनोज सिन्हा यांनी सोमवारी पवित्र अमरनाथ गुहेत वैदिक मंत्रोच्चारांच्या साथीने पहिली पूजा करून वार्षिक अमरनाथ यात्रेचे औपचारिक उद्घाटन केले. याप्रसंगी त्यांनी देशवासियांच्या सुख, शांती, समृद्धी, उत्तम आरोग्य आणि कल्याणासाठी बाबा बर्फानी यांच्याकडे प्रार्थना केली. यावर्षीच्या यात्रेसाठी पायाभूत सुविधा आणि यात्रेकरूंच्या सोयीसुविधांमध्ये लक्षणीय सुधारणा करण्यात आल्या आहेत.

3 जुलैपासून सुरू होणारी अमरनाथ यात्रा यशस्वीपणे पार पडावी यासाठी प्रशासन, श्री अमरनाथ तीर्थक्षेत्र मंडळ, लष्कर, पोलीस, सुरक्षा दल, स्थानिक नागरिक, सेवा पुरवठादार आणि स्वयंसेवक पूर्ण समन्वयाने काम करत असल्याचे उपराज्यपाल मनोज सिन्हा यांनी सांगितले. जम्मू काश्मीरच्या लोकांच्या सहकार्याने, प्रशासन पूर्णपणे सज्ज असून बाबा अमरनाथच्या भक्तांच्या स्वागतासाठी सर्व आवश्यक व्यवस्था करण्यात आली आहे. यात्रेकरूंसाठी ही यात्रा सुरक्षित, सुरळीत आणि अविस्मरणीय व्हावी, हे यामागील उद्दिष्ट आहे.

अमरनाथ यात्रेची तयारी पूर्ण

आगामी अमरनाथ यात्रेसाठी जम्मू आणि काश्मीरमध्ये व्यापक सुरक्षा आणि लॉजिस्टिक्सची व्यवस्था पूर्ण झाली आहे. यात्रा मार्गावर चार प्रमुख बेस कॅम्प आणि 100 हून अधिक संक्रमण शिबिरे उभारण्यात आली आहेत, जिथे यात्रेकरूंना निवास, भोजन आणि इतर आवश्यक सुविधा पुरवल्या जात आहेत. अमरनाथ यात्रेकरूंच्या संरक्षणासाठी बहुस्तरीय सुरक्षा व्यवस्था उभारण्यात आली आहे. आतापर्यंत बाबा बर्फानीच्या दर्शनासाठी 3,50,000 हून अधिक यात्रेकरूंनी नोंदणी केली आहे. यात्री निवासमध्ये यात्रेकरूंसाठी एसी आणि नॉन-एसी निवास सुविधा उपलब्ध आहेत.