FIFA WC 2026: 20 सामन्यांत 20 गोल! एम्बाप्पेने रचला इतिहास, फ्रान्सची सेमीफायनलमध्ये दमदार एंट्री

किलियन एमबाप्पेच्या शानदार कामगिरीच्या जोरावर फ्रान्सने फिफा विश्वचषकाच्या उपांत्य फेरीत आपले स्थान निश्चित केले आहे. उपांत्यपूर्व फेरीच्या सामन्यात फ्रान्सने मोरोक्कोचा 2-0 असा पराभव केला. एमबाप्पेने 60व्या मिनिटाला पहिला गोल करत फ्रान्सला आघाडी मिळवून दिली. त्यानंतर अवघ्या सहा मिनिटांनी विंगर उस्मान डेम्बेलेने दुसरा गोल करत फ्रान्सची आघाडी 2-0 अशी भक्कम केली.

पहिल्या सत्रातील 28व्या मिनिटालाही एमबाप्पेला गोल करण्याची संधी मिळाली होती. मात्र, मोरोक्कोचा गोलकीपर यासिन बोनूने उत्कृष्ट बचाव करत त्याचा प्रयत्न हाणून पाडला.

या विश्वचषकात एमबाप्पेने आतापर्यंत एकूण 8 गोल केले आहेत. या कामगिरीसह त्याने अर्जेंटिनाचा दिग्गज फुटबॉलपटू लिओनेल मेस्सीच्या गोलसंख्येची बरोबरी केली आहे, ज्यामुळे ‘गोल्डन बूट’च्या शर्यतीत अधिकच रंगत निर्माण झाली आहे.

पहिल्या सत्रात,28व्या मिनिटाला आपल्या संघाला आघाडी मिळवून देण्याची सुवर्णसंधी एमबाप्पेकडे होती. मोरोक्कोचा डिफेंडर नौसेर मजराउई याने ‘बॉक्स’मध्ये फाऊल केल्यामुळे फ्रान्सला पेनल्टी मिळाली होती. मात्र, यासिन बोनूने पेनल्टीची दिशा अचूक ओळखली आणि डावीकडे झेप घेत चेंडू अडवला, ज्यामुळे फ्रेंच कर्णधाराला गोल करता आला नाही.

पेनल्टी हुकली असली तरी, एमबाप्पेने निराशा मनावर घेतली नाही आणि दुसऱ्या सत्रात जोरदार पुनरागमन केले. 60व्या मिनिटाला पेनल्टी एरियामध्ये चेंडू ड्रिबल करत नेत त्याने आपला वैशिष्ट्यपूर्ण ‘रॉकेट शॉट’ लगावला आणि चेंडू थेट गोलजाळीत धाडला, ज्यामुळे फ्रान्सला महत्त्वपूर्ण आघाडी मिळाली.

मोरोक्कोविरुद्धच्या या सामन्यात एमबाप्पेने आणखी एक महत्त्वाचा टप्पा गाठला. त्याने आपल्या कारकिर्दीतील 20व्या विश्वचषक सामन्यात 20वा गोल नोंदवला. यासह, फिफा विश्वचषकाच्या इतिहासात सर्वाधिक गोल करणाऱ्यांच्या यादीत तो दुसऱ्या स्थानावर पोहोचला आहे. त्याच्या पुढे केवळ लिओनेल मेस्सी आहे. मेस्सीने 31 विश्वचषक सामन्यांत 21 गोल ​​करत अव्वल स्थान कायम राखले आहे.