HSRP नंबर प्लेट: आता काहीही खरे नाही! एचएसआरपी नंबर प्लेटसाठी काउंटडाउन सुरू; मंत्री, खासदार, आमदार यांनाही सूट नाही

विजय काटे: परिवहन विभागाने राज्यातील वाहन मालकांना एक महत्त्वाचा इशारा दिला आहे. राज्याचे परिवहन मंत्री प्रताप सरनाईक यांनी स्पष्ट केले आहे की, ३१ डिसेंबरनंतर  (HSRP नंबर प्लेट) नसलेल्या वाहनांवर कठोर कारवाई केली जाईल. त्यामुळे, ज्या वाहन मालकांनी अद्याप HSRP प्लेट्स लावलेल्या नाहीत, त्यांना मुदतीपूर्वी ही प्रक्रिया पूर्ण करण्याचे आवाहन करण्यात आले आहे.

परिवहन विभागाच्या मते, गुन्हेगारी घटनांमध्ये बनावट किंवा साध्या नंबर प्लेट्सचा गैरवापर होत असल्याचे निदर्शनास आले आहे. यामुळे वाहनांची अचूक ओळख सुनिश्चित करण्यासाठी आणि कायद्याची अंमलबजावणी करणाऱ्या यंत्रणांना मदत करण्यासाठी सर्व वाहनांवर एचएसआरपी (HSRP) नंबर प्लेट्स अनिवार्य करण्यात आल्या आहेत.

परिवहन मंत्री  म्हणाले की, राज्यात आतापर्यंत सुमारे एक कोटी जुन्या वाहनांवर एचएसआरपी नंबर प्लेट्स लावण्यात आल्या आहेत. मात्र, एकूण जुन्या वाहन मालकांपैकी केवळ ५५ ते ५६ टक्क्यांनीच ही प्रक्रिया पूर्ण केली आहे. त्यांनी उर्वरित वाहन मालकांना ३१ डिसेंबरपूर्वी एचएसआरपी लावून घेण्याचे आवाहन केले.

सरनाईक यांनी स्पष्टपणे सांगितले की, मंत्री, खासदार, आमदार, लोकप्रतिनिधी असोत वा सामान्य नागरिक, सर्वांसाठी नियम सारखेच आहेत. एचएसआरपी नंबर प्लेटच्या बाबतीत कोणालाही विशेष सूट दिली जाणार नाही.

तसेच, ३१ डिसेंबरनंतर एचएसआरपी नंबर प्लेट नसलेल्या वाहनांवर मोटार वाहन कायद्यांतर्गत कारवाई केली जाईल. नियमांचे उल्लंघन करणाऱ्या वाहन मालकांवर दंडात्मक कारवाई केली जाईल आणि लोकप्रतिनिधींच्या वाहनांवरही अशीच कारवाई केली जाईल, असे परिवहन मंत्र्यांनी स्पष्ट केले. त्यामुळे, परिवहन विभागाने वाहन मालकांना अंतिम मुदतीची वाट न पाहता लवकरात लवकर एचएसआरपी नंबर प्लेट लावून नियमांचे पालन करण्याचे आवाहन केले आहे.

एचएसआरपी (उच्च सुरक्षा नोंदणी प्लेट) ही वाहनांसाठी बनवलेली एक उच्च सुरक्षा नोंदणी प्लेट आहे. ही प्लेट ॲल्युमिनियमची बनलेली असून तिच्यावर विविध सुरक्षा वैशिष्ट्ये आहेत. बनावट नंबर प्लेट्सना प्रतिबंध करणे, वाहने सहज ओळखणे आणि गुन्हेगारी घटनांमध्ये वाहनांचा माग काढणे हा या प्लेटचा मुख्य उद्देश आहे.

एचएसआरपी नंबर प्लेटची वैशिष्ट्ये

मजबूत ॲल्युमिनियम प्लेट – सहजपणे खराब होत नाही किंवा बदलता येत नाही.

लेझर-कोड (लेझरने कोरलेला अद्वितीय अनुक्रमांक) – प्रत्येक प्लेटवर एक अद्वितीय क्रमांक असतो.

क्रोमियम-आधारित होलोग्राम – यामुळे बनावट प्लेट ओळखणे सोपे होते.

न काढता येणारा स्नॅप लॉक – एकदा प्लेट काढल्यावर ती पुन्हा बसवता येत नाही.

परावर्तक शीट – रात्रीच्या वेळीसुद्धा अंक स्पष्टपणे दिसतो.

विंडशील्डवर एक रंगीत स्टिकर दिलेला असतो – जो इंधनाचा प्रकार (पेट्रोल, डिझेल, सीएनजी, इलेक्ट्रिक) दर्शवतो.