भारतात सर्वाधिक गरम शहरे आहेत.

जगातील 50 सर्वात उष्ण शहरांची नावे जाहीर

वृत्तसंस्था/ नवी दिल्ली

जगातील 22 सर्वात उष्ण शहरांमध्ये शुक्रवारी 47 अंश सेल्सिअसपेक्षा जास्त तापमानाची नोंद झाली. ही सर्व शहरे भारतात असून त्यापैकी 13 शहरे उत्तर प्रदेशात आहेत. ओडिशातील बोलंगीर आणि बिहारमधील सासाराम ही सर्वात उष्ण शहरे होती. भारतीय हवामान विभागाच्या माहितीनुसार, गुरुवारी देशभरातील 35 शहरांमध्ये रात्रीचे तापमान 30 अंश सेल्सिअसपेक्षा जास्त होते.

सतत वाहणारे कोरडे वायव्य वारे, निरभ्र आकाश आणि मान्सूनला झालेला विलंब ही या तीव्र उष्णतेची प्रमुख कारणे आहेत. यामुळेच देशाच्या मोठ्या भागात तीव्र उष्णता जाणवत आहे. दिल्ली आणि एनसीआरमध्येही तापमान सातत्याने वाढत असून, येत्या काही दिवसांत ते 45 अंश सेल्सिअसपर्यंत पोहोचण्याची शक्यता आहे. दरम्यान, महाराष्ट्रातील विदर्भ प्रदेशात या आठवड्यात 46 अंश सेल्सिअसपर्यंत तापमानाची नोंद झाली असून, त्यामुळे परिस्थिती आणखी गंभीर झाली आहे. या उष्णतेचा थेट परिणाम आता लोकांच्या आरोग्यावर जाणवत आहे. अनेक राज्यांतील रुग्णालयांमध्ये निर्जलीकरण, अशक्तपणा आणि उष्माघाताची प्रकरणे वाढत आहेत. कामगार, मुले आणि वृद्ध व्यक्तींना याचा सर्वाधिक फटका बसत आहे. डॉक्टर आणि प्रशासनाने लोकांना दुपारच्या वेळी बाहेर न जाण्याचे, भरपूर पाणी पिण्याचे आणि हलके कपडे घालण्याचे आवाहन केले आहे. तसेच अनावश्यक प्रवास टाळण्याचाही सल्ला दिला आहे.

बिहारमध्ये शाळा-कार्यालयांच्या वेळेत बदल

वाढत्या उष्म्याच्या पार्श्वभूमीवर बिहारमधील पाटणा आणि गया येथे उष्णतेमुळे 22 ते 26 मे पर्यंत इयत्ता 5 वी पर्यंतच्या शाळा बंद ठेवण्यात आल्या आहेत. दरम्यान, राज्यातील मधेपुरा आणि सहरसा येथे गुरुवारी पाऊस सुरू असतानाच वीज कोसळून तीन जणांचा मृत्यू झाला. पंजाब सरकारने सरकारी कार्यालये आणि शाळांच्या वेळा बदलल्या आहेत. कार्यालये आणि शाळा आता सकाळी 7:30 वाजता उघडतील आणि दुपारी 1:30 वाजता बंद होतील.