सीएसके विरुद्धच्या सामन्यापूर्वी मुंबई इंडियन्सला मोठा धक्का, रोहित शर्मा प्लेइंग इलेव्हनमधून बाहेर!

आयपीएल २०२६ चा एक मोठा सामना २३ एप्रिल रोजी खेळला जाणार आहे. या सामन्यापूर्वी मुंबई इंडियन्सला एक मोठा धक्का बसला आहे. संघाचा स्टार खेळाडू रोहित शर्मा या सामन्यात खेळण्याबाबत सस्पेंस निर्माण झाला आहे. ‘क्रिकबझ’ने दिलेल्या माहितीनुसार, रोहित या सामन्यात प्लेइंग-११ चा भाग नसेल. रोहित अद्याप त्याच्या फिटनेसबाबत पूर्णपणे समाधानी नाही, त्यामुळे त्याने या सामन्यातून विश्रांती घेण्याचा निर्णय घेतला आहे. चेन्नईविरुद्धच्या सामन्यात तो मैदानात न उतरणे मुंबईसाठी मोठा फटका ठरू शकतो.

​रोहित शर्मा या हंगामाच्या सुरुवातीला उत्कृष्ट लयीत दिसत होता. पहिल्याच सामन्यात त्याने धडाकेबाज फलंदाजी करत अर्धशतक झळकावले होते. मात्र, त्यानंतर आरसीबीविरुद्धच्या सामन्यात त्याला ‘हॅमस्ट्रिंग’चा त्रास झाला होता. त्या सामन्यात दुखापतीमुळे त्याला ‘रिटायर्ड आउट’ होऊन मैदानाबाहेर जावे लागले होते. हा सामना १२ एप्रिल रोजी झाला होता. जवळपास १० दिवसांनंतर रोहितने आता नेटमध्ये फलंदाजीला सुरुवात केली असली, तरी तो अद्याप मॅच-फिट (सामन्यासाठी पूर्णपणे तंदुरुस्त) होऊ शकलेला नाही. आपल्या फिटनेसबाबत तो कोणतीही हयगय करू इच्छित नाही.

​रोहित शर्माच्या अनुपस्थितीत दक्षिण आफ्रिकेच्या सलामीवीरांची जोडी क्विंटन डी कॉक आणि रायन रिकल्टन संघासाठी सलामीला उतरतील. मुंबई इंडियन्सचा संघ सलग ४ पराभवानंतर आता पुन्हा लयीत परतला आहे. गेल्या सामन्यात संघाने गुजरातचा ९९ धावांच्या मोठ्या फरकाने पराभव केला होता. चेन्नईविरुद्ध विजय मिळवण्यासाठी मुंबईला आपली पूर्ण ताकद लावावी लागेल. सध्या मुंबई ६ सामन्यांत २ विजयांसह गुणतालिकेत ७ व्या क्रमांकावर आहे.