वनडे वर्ल्ड कप 2027 बाबत सर्वात मोठी अपडेट आली समोर; 'या' तारखेपासून सुरू होणार क्रिकेटचा महाकुंभ, विराट-रोहित खेळणार का?

आयसीसी वनडे वर्ल्ड कप २०२७ च्या शेड्यूलबद्दल (वेळापत्रक) एक मोठी माहिती समोर आली आहे. दक्षिण आफ्रिका, झिम्बाब्वे आणि नामिबिया यांच्या संयुक्त यजमानपदाखाली होणाऱ्या या स्पर्धेच्या संभाव्य तारखांवर चर्चा झाली असून आता क्रिकेट चाहत्यांची प्रतीक्षा लवकरच संपू शकते. रिपोर्ट्सनुसार, ३१ मे रोजी अहमदाबाद येथे झालेल्या आयसीसीच्या बैठकीत वर्ल्ड कप २०२७ च्या वेळापत्रकावर चर्चा करण्यात आली. मिळालेल्या माहितीनुसार, या स्पर्धेची सुरुवात ४ ऑक्टोबर २०२७ पासून होऊ शकते, तर अंतिम सामना (फायनल) २१ नोव्हेंबर रोजी खेळवला जाण्याची शक्यता आहे. जुलै महिन्यात होणाऱ्या आयसीसीच्या वार्षिक सर्वसाधारण बैठकीत या वेळापत्रकाच्या अंतिम मसुद्याला मंजुरी दिली जाऊ शकते.

​वर्ल्ड कप २०२७ मध्ये एकूण ५४ सामने खेळवले जातील. यामध्ये सर्वाधिक सामन्यांचे यजमानपद दक्षिण आफ्रिकेकडे असेल. त्यांच्या वाट्याला ४१ सामने येण्याची शक्यता आहे. तर झिम्बाब्वेमध्ये ८ ते १० सामने खेळवले जाऊ शकतात, आणि नामिबियाला ३ सामन्यांचे यजमानपद मिळण्याची अपेक्षा आहे. झिम्बाब्वेमधील हरारे आणि बुलावायो व्यतिरिक्त ‘मोसी-ओआ-तुन्या इंटरनॅशनल क्रिकेट स्टेडियम’ देखील या स्पर्धेच्या प्रमुख केंद्रांमध्ये समाविष्ट असेल. या स्टेडियमचे बांधकाम या वर्षाच्या अखेरपर्यंत पूर्ण होण्याची अपेक्षा आहे. अधिकृत उद्घाटनापूर्वी येथे देशांतर्गत (डोमेस्टिक) क्रिकेट सामने देखील आयोजित केले जातील.

​दक्षिण आफ्रिका २००३ नंतर पहिल्यांदाच वनडे वर्ल्ड कपचे यजमानपद भूषवणार आहे. मात्र, या काळात देशाने २००७ चा टी-२० वर्ल्ड कप, २००९ ची चॅम्पियन्स ट्रॉफी आणि २०२३ चा महिला टी-२० वर्ल्ड कप यांसारख्या मोठ्या स्पर्धांचे यशस्वी यजमानपद सांभाळले आहे. तसेच झिम्बाब्वे आणि नामिबिया हे नुकतेच पार पडलेल्या अंडर-१९ वर्ल्ड कप २०२६ चे संयुक्त यजमान देखील होते. यावेळी वनडे वर्ल्ड कपचे स्वरूप (फॉर्मेट) बदललेले दिसेल. गेल्या दोन हंगामात जिथे १० संघांनी भाग घेतला होता, तिथे २०२७ मध्ये १४ संघ विजेतेपदासाठी एकमेकांशी भिडतील. सर्व संघांची ७-७ च्या दोन ग्रूपमध्ये विभागणी केली जाईल. प्रत्येक ग्रूपमधील टॉप-३ संघ ‘सुपर सिक्स’ फेरीत प्रवेश करतील.

​दुसरीकडे, भारतीय संघ देखील हळूहळू वर्ल्ड कप २०२७ च्या तयारीच्या दृष्टीने पावले टाकत आहे. भारत १३ जूनपासून अफगाणिस्तानविरुद्ध तीन सामन्यांची वनडे मालिका खेळणार आहे. आगामी वर्ल्ड कपच्या तयारीच्या दृष्टीने ही मालिका अत्यंत महत्त्वाची मानली जात आहे. या दौऱ्यात शुभमन गिल भारतीय संघाचे नेतृत्व (कर्णधारपद) करेल, तर दुखापतीमुळे हार्दिक पांड्या आणि विराट कोहली निवडीसाठी उपलब्ध नाहीत.