डॉक्टर ऑपरेशनसाठी आल्याच नाहीत; फोनाफोनी, शोध अन् रुग्णालयात धावाधाव, त्यांच्या केबिनमध्ये पाहि

मुंबई: मुंबई सेंट्रल येथील पश्चिम रेल्वेच्या प्रतिष्ठित ‘जगजीवन राम’ रुग्णालयात एक अत्यंत धक्कादायक घटना घडली आहे. रुग्णालयातील कान-नाक-घसा (ENT) तज्ज्ञ डॉ. अनुजा कुलकर्णी (४४) यांचा संशयास्पद मृत्यू झाला असून, त्यांचा मृतदेह त्यांच्याच कार्यालयात (कॅबिनमध्ये) जमिनीवर पडलेल्या अवस्थेत आढळल्याने खळबळ उडाली आहे. या घटनेमुळे वैद्यकीय क्षेत्रात शोककळा पसरली असून पोलिसांनी या प्रकरणाचा सखोल तपास सुरू केला आहे.(Mumbai News)

शस्त्रक्रियेसाठी डॉक्टर न आल्याने खळबळ

डॉ. अनुजा कुलकर्णी या एक निष्णात ईएनटी सर्जन होत्या. मिळालेल्या माहितीनुसार, बुधवारी सकाळी त्यांच्या काही महत्त्वाच्या शस्त्रक्रिया (Surgeries) नियोजित होत्या. ऑपरेशन थिएटरमध्ये रुग्ण आणि कर्मचारी त्यांची वाट पाहत होते, मात्र बराच वेळ झाला तरी त्या हजर झाल्या नाहीत. शस्त्रक्रिया विभागात त्या न पोहोचल्याने सहकारी डॉक्टरांनी त्यांना मोबाईलवर आणि त्यांच्या कार्यालयातील दूरध्वनीवर अनेकदा संपर्क साधण्याचा प्रयत्न केला, मात्र तिथून कोणताही प्रतिसाद मिळत नव्हता.

बंद दारामागे धक्कादायक दृश्य

काहीतरी अघटित घडल्याच्या संशयाने रुग्णालयातील एका कनिष्ठ डॉक्टरने चौथ्या मजल्यावर असलेल्या डॉ. अनुजा यांच्या कार्यालयाकडे धाव घेतली. तिथे कार्यालयाचे दार आतून बंद होते. अनेकदा दरवाजा ठोठावूनही आतून आवाज येत नसल्याने कर्मचाऱ्याने दरवाजाच्या काचेच्या पॅनलमधून आत डोकावून पाहिले. तेव्हा डॉ. अनुजा या खुर्चीजवळ जमिनीवर बेशुद्धावस्थेत पडलेल्या दिसल्या.

तातडीने दरवाजा तोडून कर्मचारी आणि इतर वरिष्ठ डॉक्टर आत शिरले, मात्र तपासणीअंती त्यांना मृत घोषित करण्यात आले. घटनेची माहिती मिळताच नागपाडा पोलिसांनी घटनास्थळी धाव घेत पंचनामा केला.

हृदयविकाराचा झटका की आत्महत्या?

डॉ. अनुजा कुलकर्णी या अविवाहित होत्या आणि रुग्णालयातील कर्मचारी व डॉक्टरांमध्ये अत्यंत लोकप्रिय होत्या. प्राथमिक तपासणीत पोलिसांनी कोणतीही सुसाईड नोट किंवा संशयास्पद वस्तू आढळली नसल्याचे सांगितले आहे. काही रिपोर्ट्सनुसार, हृदयविकाराचा झटका आल्याने आणि वेळेत मदत न मिळाल्याने त्यांचा मृत्यू झाला असावा, अशी शक्यता वर्तवण्यात येत आहे. मात्र, पोलिसांनी सर्व शक्यता लक्षात घेऊन तपास सुरू ठेवला आहे. मृत्यूचे नेमके कारण स्पष्ट होण्यासाठी त्यांचे पार्थिव शवविच्छेदनासाठी जे.जे. रुग्णालयात पाठवण्यात आले आहे.

सीसीटीव्ही फुटेजची तपासणी सुरू

नागपाडा पोलिसांनी याप्रकरणी अपघाती मृत्यूची (ADR) नोंद केली आहे. पोलीस उपायुक्त कृष्णकांत उपाध्याय यांनी दिलेल्या माहितीनुसार, रुग्णालयातील आणि परिसरातील सीसीटीव्ही फुटेजची तपासणी केली जात आहे. डॉ. अनुजा यांच्या मृत्यूचा अहवाल आल्यानंतरच या प्रकरणातील गूढ उकलण्याची शक्यता आहे. एका बड्या रुग्णालयात कार्यरत असलेल्या डॉक्टरचा अशा प्रकारे मृत्यू झाल्याने रुग्णालयातील सुरक्षा आणि डॉक्टरांवरील कामाचा ताण यावरही आता चर्चा सुरू झाली आहे.

आणखी वाचा