पत्नी दोन मुलांना घेऊन माहेरी गेली; घरात एकटं असताना पोलीस हवालदाराने गळ्याला लावला दोर; अंधेरी

मुंबई: मुंबईच्या अंधेरी पूर्वेत न्यू पोलीस वसाहतीमध्ये पोलीस हवालदार गळफास लावून आत्महत्या केल्याची घटना समोर आली आहे. 46 वर्षीय पोलीस हवालदार मरोळ एल (LA) मध्ये कार्यरत होते. मागील तीन महिन्यापासून त्यांना कावीळचा आजार होता. कावीळचा आजार असल्यामुळे त्यांच्यावर उपचार सुरू होता. या उपचारादरम्यान त्यांची पत्नी आपल्या दोन मुलांना घेऊन माहेरी निघून गेल्यामुळे पोलीस हवालदार तणावात होते. मागील तीन ते साडेतीन महिन्यापासून मरोळ LA मध्ये देखील नोकरीपासून पोलीस हवालदार गैरहजर होते.

पत्नी मुलं नसल्यामुळे आणि आजारांपासून तणावत असलेल्या पोलीस हवालदारने काल आपल्या घरामध्ये पंख्यामधून गळफास लावून आत्महत्या केली. आत्महत्या करण्यापूर्वी पोलीस हवालदार यांनी सुसाईड नोट लिहून आजारापासून तणावात आणि कुटुंब सोबत नसल्याचा तणावातून आत्महत्या करत आहेत असं लिहून आत्महत्या केली आहे. सध्या अंधेरी पोलिसांनी या प्रकरणी एडीआर दाखल करून पोलीस हवलदार ने टोकाचा पाऊल का उचलला या संदर्भात अधिक तपास करत आहे.

चार दिवसांत तीन पोलिसांची आत्महत्या

केवळ चार दिवसांच्या कालावधीत तिसऱ्यांदा पोलिसाने आत्महत्या केल्याची धक्कादायक घटना समोर आली आहे. सतत घडणाऱ्या या आत्महत्यांमुळे पोलिस दलातील तणाव आणि मानसिक आरोग्याबाबत गंभीर प्रश्न निर्माण झाले आहेत. पहिली घटना 13 ऑगस्ट रोजी घडली. कांदिवलीच्या समता नगर पोलीस ठाण्यात कार्यरत असलेले गणेश राऊळ (32) यांनी नालासोपारा रेल्वे स्थानकात ट्रेनखाली उडी मारून आत्महत्या केली. सुरुवातीला हा अपघात असल्याचे मानले जात होते, मात्र सीसीटीव्ही फुटेज तपासल्यानंतर ही आत्महत्या असल्याचे स्पष्ट झाले.

दुसरी घटना दुसऱ्याच दिवशी, म्हणजे 14 ऑगस्ट रोजी भाईंदरमध्ये घडली. ऋतिक चौहान (25 ) या तरुण पोलिसाने गळफास घेऊन आत्महत्या केली. ऋतिक 2023 मध्ये पोलिस दलात दाखल झाला होता. तो आईसह भाईंदरमधील अभिनव इमारतीत भाड्याने राहत होता. आई गावी गेल्यावर त्याने पंख्याला नायलॉनची दोरी लावून आयुष्य संपवलं.

तिसरी घटना शनिवारी घडली. अंधेरीत राहणाऱ्या मुकेश देव (45) या पोलिसाने आत्महत्या केली. आत्महत्येचे कारण मात्र तिन्ही घटनांमध्ये अद्याप स्पष्ट झालेले नाही. या सलग घडलेल्या आत्महत्यांमुळे पोलिस दलातील मानसिक तणाव, कामाचा ताण, वैयक्तिक समस्या यावर प्रश्नचिन्ह निर्माण झाले आहे. पोलिसांच्या या वाढत्या आत्महत्यांबद्दल समाजातील विविध स्तरांतून चिंता व्यक्त केली जात आहे.

आणखी वाचा