नांदेड : स्थानिक स्वराज्य संस्थेच्या निवडणुका ह्या कार्यकर्त्यांच्या निवडणुका (Election) असतात अस बोलल्या जातं. मात्र प्रत्यक्षात पाहता अनेक जिल्ह्यात मंत्र्याच्या आणि नेत्यांच्या कुटुंब सदस्याला आणि नातेवाईकांना उमेदवारी दिल्याचे चित्र पहायला मिळत आहे. नांदेड (Nanded) जिल्हातील लोहा नगर परिषदेच्या निवडणूकीत भारतीय जनता पक्षाचे (भाजप) चक्क एकाच कुटुंबातील सहा जणांना उमेदवारी दिल्याचं समोर आलं आहे. त्यामुळे, घराणेशाहीवरुन काँग्रेसवर सातत्याने हल्लाबोल करणाऱ्या भाजपाच्या भूमिकेवरुन राजकीय वर्तुळात चर्चा रंगली आहे. लोहा नगरपरिषदेच्या नगराध्यक्षपदासाठी भाजपने गजानन सूर्यवंशी यांना उमेदवारी जाहीर केली आहे. तर, नगरसेवक पदासाठी गजानन सूर्यवंशी यांची पत्नी गोदावरी सूर्यवंशी, भाऊ सचिन सूर्यवंशी, भावाची पत्नी सुप्रिया सचिन सूर्यवंशी, मेव्हुणा युवराज वाघमारे, भाच्याची पत्नी रीना अमोल व्यवहारे या सर्वांना उमेदवारी दिली आहे. पक्षात घराणेशाही चालत नाही म्हणाऱ्या भाजपने एकाच घरातील सहा जणांना तिकीट दिल्याने जिल्ह्यात ही नगरपरिषद चर्चेचा विषय बनली आहे.
नांदेड जिल्ह्याचं लक्ष लोहा नगर परिषदेकडे लागलं असून भाजप, राष्ट्रवादी अजित पवार गट आणि काँग्रेस अशी तिरंगी लढत पहायला मिळणार आहे. राष्ट्रवादी अजित पवार गटाचे आमदार प्रताप पाटील चिखलीकर यांचा लोहा बाल्लेकिल्ला मानला जातो. आतापर्यंतच्या निवडणुकीत प्रताप पाटील चिखलीकर यांचे वर्चस्व राहिले आहे. लोहा नगर परिषद एकूण दहा प्रभाग असून 20 नगरसेवकांसाठी ही निवडणूक होतं आहे. मंगळवारी अर्ज भरण्याच्या शेवटच्या क्षणी काँग्रेस, भाजपा, राष्ट्रवादी अजित पवार, शिवसेना शिंदे गटासह सर्वच पक्षातील उमेदवारांनी अर्ज दाखल केले. भाजपने या निवडणुकीत सर्व जागेवर उमेदवार निवडणुकीच्या रिंगणात उतरवले असले तरी एकाच कुटुंबातील सहा जणांना उमेदवारी दिली आहे. ज्यात नगराध्यक्ष पदासाठी गजानन सूर्यवंशी नगराध्यक्ष यांना उमेदवारी देण्यात आली आहे, तसेच पत्नी गोदावरी गजानन सूर्यवंशी यांना (प्रभाग ७ अ) मधून, भाऊ सचिन सुभाषराव सूर्यवंशी यांना (प्रभाग क्रमांक १ अ) मधून, भावाची पत्नी सुप्रिया सचिन सूर्यवंशी (प्रभाग ८ अ) मधून, मेव्हुणा युवराज वसंतराव वाघमारे (प्रभाग क्रमांक ७ ब) मधून, भाच्याची पत्नी रिना अमोल व्यवहारे (प्रभाग क्रमांक ३) मधून उमेदवारी देण्यात आली आहे.
अशोक चव्हाणांच्या नेतृत्वात निवडणुका
माजी मुख्यमंत्री अशोक चव्हाण यांच्या नेतृत्वात भाजप नांदेडच्या स्थानिक स्वराज्य संस्थेच्या निवडणुका लढत आहे. चव्हाण हे भाजपावासी झाल्यापासून जिल्ह्यात भाजपची ताकद वाढली आहे. लोहा नगर परिषदेसाठी इच्छुकांची संख्या देखील अधिक होती, असे असताना भाजपने एकाच कुटुंबातील सहा जणांना उमेदवारी दिल्याने चर्चेचा विषय बनला आहे. एकीकडे भाजपकडून काँग्रेस पक्षावर घराणेशाहीचा आरोप केला जातो. त्यातच आता एकाच कुटुंबातील सहा जणांना तिकीट दिल्याने हा घराणेशाहीचा प्रकार नाही का असा सवाल उपस्थित होतं आहे.
नांदेड जिल्ह्यात 12 नगरपरिषदांच्या निवडणुका
नांदेड जिल्ह्यात 12 नगर परिषदा आणि एक नगर पंचायतीसाठी निवडणूक होतं आहे. ज्यात लोहा तालुक्याकडे सर्वांचे लक्ष लागलं आहे. भाजप, राष्ट्रवादी अजित पवार गट आणि काँग्रेसने सर्वच जागेवर उमेदवार जाहीर केले आहे, मात्र खरी लढत महायुतीतील भाजप आणि राष्ट्रवादी अजित पवार गटात होणार आहे. भाजपकडून नगराध्यक्ष पदासाठी गजानन सूर्यवंशी रिंगणात उतरवले आहे.
हेही वाचा
राज्यातील पाच IAS अधिकाऱ्यांच्या बदल्या; 10 वी अन् 12 वी पुणे बोर्डाच्या अध्यक्षपदी त्रिगुण कुलकर्णी
आणखी वाचा
Comments are closed.