किन्नर समाजाच्या गद्दीपतींवर गुन्हा दाखल, अश्लील फोटो व्हायरल करण्याची धमकी देत मागितली 15 लाखा

नाशिक क्राईम न्यूज : नाशिकमधून (Nashik) एक धक्कादायक आणि खळबळजनक प्रकार समोर आला असून, किन्नर समाजाच्या गद्दीपती सलमा नायक यांच्यासह एका तरुणावर खंडणी आणि धमकीचा गंभीर गुन्हा दाखल करण्यात आला आहे. नग्न अवस्थेतील फोटो व्हायरल करण्याची धमकी देत धर्मांतरासाठी दबाव टाकणे आणि त्यास नकार दिल्यास तब्बल 15 लाख रुपयांची खंडणी मागितल्याचा आरोप पंचवटी पोलीस ठाण्यात (Panchavati Police Station) दाखल तक्रारीत करण्यात आला आहे. या प्रकरणी संशयित अब्दुल जलालउद्दीन शेख आणि त्याची गुरू असल्याचे सांगितले जाणारी सलमा नायक यांच्याविरोधात पंचवटी पोलीस ठाण्यात गुन्हा नोंदवण्यात आला आहे.

Nashik Crime News: काय आहे संपूर्ण प्रकरण?

पंचवटीतील गजानन चौक परिसरात राहणाऱ्या 25 वर्षीय युवकाची ओळख सन 2020 मध्ये एका तरुणाच्या माध्यमातून ‘पार्वती’ नावाने ओळख करून देण्यात आलेल्या व्यक्तीशी झाली. ही व्यक्ती किन्नरासारखा वेश परिधान करत होती आणि कालिकानगर परिसरात राहत होती. संबंधित ठिकाणी देवीचा दरबार भरवला जात असल्याने, ओळखीच्या माध्यमातून युवकाचे त्या घरी येणे-जाणे सुरू झाले. या दरम्यान संशयिताने युवकाचे नग्न अवस्थेतील अश्लिल फोटो मोबाईलमध्ये काढून घेतल्याचा आरोप तक्रारीत करण्यात आला आहे. काही काळानंतर तक्रारदार युवकाला ‘पार्वती’ ही व्यक्ती नसून, अब्दुल जलालउद्दीन शेख असल्याचे समजले. यानंतर युवकाने त्याच्याशी संपर्क कमी केला.

Nashik Crime News: आत्महत्येची धमकी आणि खंडणीचा दबाव

संपर्क कमी केल्यानंतर संशयित अब्दुल शेख याने आत्महत्या करण्याची धमकी देत युवकावर मानसिक दबाव टाकल्याचा आरोप आहे. गेल्या सहा महिन्यांपासून युवकाच्या मोबाईलवर सतत फोन करत नग्न फोटो व्हायरल करण्याची धमकी देण्यात येत होती. याचबरोबर 15 लाख रुपयांची खंडणी मागितली जात होती, असे तक्रारीत नमूद करण्यात आले आहे. इतकेच नव्हे तर, पैसे न दिल्यास धर्मांतर करण्यासाठी दबाव टाकण्यात आला आणि धर्मांतरास नकार दिल्यास युवक व त्याच्या कुटुंबीयांना जीवे मारण्याची धमकी दिल्याचा गंभीर आरोपही तक्रारीत करण्यात आला आहे.

Nashik Crime News: पोलिसांचा तपास सुरू

या तक्रारीच्या आधारे पंचवटी पोलीस ठाण्यात संशयित अब्दुल जलालउद्दीन शेख आणि सलमा नायक यांच्याविरोधात गुन्हा दाखल करण्यात आला आहे. या प्रकरणाचा अधिक तपास पंचवटी पोलीस करत आहेत. या प्रकरणामुळे नाशिकमध्ये एकच खळबळ उडाली असून, पुढील तपासात आणखी कोणती धक्कादायक माहिती समोर येते का? याकडे सर्वांचे लक्ष लागले आहे.

आणखी वाचा

Nashik Crime News: 400 कोटींच्या कंटेनर चोरी प्रकरणात मोठी घडामोड, मुख्य संशयित पोलिसांना शरण, खरंच चोरी झाली की बनाव?

आणखी वाचा