नाशिकमध्ये प्रचंड गोंधळ, भाजपकडून पोलीस बंदोबस्तात AB फॉर्मचं वाटप; तिकिटाचा काळाबाजार होत असल्

नाशिक निवडणूक 2026: महापालिका निवडणुकीसाठी उमेदवारी अर्ज भरण्याचा आज शेवटचा दिवस असताना नाशिकमध्ये (Nashik Election 2026) भाजपच्या (BJP) तिकीट वाटपामुळे प्रचंड गोंधळ उडाला आहे. भाजपकडून पोलीस बंदोबस्तात AB फॉर्मचे वाटप सुरू असल्याचे चित्र पाहायला मिळाले आहे. त्यातच इच्छुक उमेदवारांनी थेट तिकिटांचा काळाबाजार सुरू असल्याचा गंभीर आरोप केल्याने खळबळ उडाली आहे.

गेल्या काही दिवसांपासून नाशिकमध्ये निष्ठावंत कार्यकर्त्यांना भाजपकडून डावलले जात असल्याने निष्ठावंत चांगलेच आक्रमक झाल्याचे पाहायला मिळाले होते. याच नाराजीचा उद्रेक आज थेट रस्त्यावर पाहायला मिळाला. शहराध्यक्ष सुनील केदार यांच्या एबी फॉर्म घेऊन जाणाऱ्या वाहनाचा इच्छुक उमेदवारांकडून पाठलाग करण्यात आला होता. पंचवटी आणि नवीन सिडको परिसरातील इच्छुक उमेदवार या पाठलागात सहभागी असल्याची माहिती समोर आली होती. सुमारे एक तास नाशिक-मुंबई महामार्गावर तिकीट वाटपाचा थरार दिसून आला.

Nashik Election 2026: भाजपकडून पोलीस बंदोबस्तात AB फॉर्मचं वाटप

यानंतर शहराध्यक्ष सुनील केदार, आमदार राहुल ढिकले, सीमा हिरे यांच्या उपस्थितीत नाशिकमध्ये तिकीट वाटप सुरु करण्यात आले. मात्र, या ठिकाणी वाढत्या तणावाची शक्यता लक्षात घेता मोठ्या प्रमाणात पोलीस बंदोबस्त तैनात करण्यात आला आहे. तिकीट वाटपाच्या ठिकाणी कार्यकर्त्यांची मोठ्या प्रमाणावर गर्दी झाल्याने नाशिक पोलीस आयुक्त संदीप कर्णिक स्वतः घटनास्थळी दाखल झाले. त्यांनी तिकीट वाटपाच्या ठिकाणी जमलेली गर्दी तात्काळ पांगवली आहे.

Nashik Election 2026: तिकिटाचा काळाबाजार होत असल्याचा इच्छुकांचा आरोप

तर तिकिटाचा काळाबाजार होत असल्याचा खळबळजनक आरोप काही इच्छुक उमेदवारांनी केलाय. तिकीट वाटपाच्या या गदारोळामुळे नाशिक महापालिका निवडणूक राज्यभर चर्चेचा विषय ठरली आहे. आता भाजप नेतृत्व इच्छुक उमेदवारांची नाराजी कशी दूर करते आणि पुढील काही तासांत आणखी काय घडामोडी घडतात? याकडे संपूर्ण राजकीय वर्तुळाचे लक्ष लागले आहे.

Nashik Election 2026: शिवसेना–राष्ट्रवादी युतीचे पहिले चार उमेदवार जाहीर

दरम्यान, भाजपने नाशिक महानगरपालिकेसाठी स्वबळावर लढण्याचा नारा दिल्यानंतर, शिंदे गटाची शिवसेना आणि अजित पवारांची राष्ट्रवादी काँग्रेस युती जाहीर केली आहे. शिवसेना आणि राष्ट्रवादी काँग्रेसकडून युतीचे पहिले चार उमेदवार जाहीर करण्यात आले आहेत, पहिल्या चार उमेदवारांमध्ये स्मिता दिपक पाटोदकर, माजी नगरसेवक समीर कांबळे, राष्ट्रवादी शहराध्यक्ष रंजन ठाकरे यांच्या पत्नी सीमा ठाकरे आणि माजी नगरसेविका हेमलता पाटील यांचा समावेश आहे. सर्व उमेदवारांनी युतीच्या एबी फॉर्मवर अर्ज दाखल केले केल्याची माहिती राष्ट्रवादीचे शहराध्यक्ष रंजन ठाकरे यांनी दिली आहे.

आणखी वाचा

Malegaon Election 2026: नाशिकनंतर मालेगावमध्येही महायुती तुटली; भाजप, शिवसेना अन् राष्ट्रवादी स्वतंत्र निवडणूक लढणार

आणखी वाचा