महिला टी20 विश्वचषकात मोठा ट्विस्ट! न्यूझीलंड बाहेर, इंग्लंडने वेस्ट इंडिजला दिलं सेमीफायनलचं तिकीट
आयसीसी महिला टी-20 विश्वचषक 2026 मध्ये एक मोठा उलटफेर पाहायला मिळाला. गतविजेत्या न्यूझीलंडचे आव्हान साखळी फेरीतच संपुष्टात आले. यजमान इंग्लंडने आपला उत्कृष्ट फॉर्म कायम राखत न्यूझीलंडचा नऊ गडी राखून पराभव केला आणि सलग पाचवा विजय नोंदवला. या विजयासह इंग्लंडने ‘गट ब’ (Group B) मध्ये अपराजित राहत अव्वल स्थान पटकावले. तर आयर्लंडकडून पराभव होऊनही वेस्ट इंडीजने उपांत्य फेरीत प्रवेश केला. हा सामना न्यूझीलंडच्या तीन दिग्गज खेळाडूंचा – सोफी डिव्हाइन, सुझी बेट्स आणि लिया तहुहू – शेवटचा आंतरराष्ट्रीय सामना ठरला.
लंडनच्या ‘द ओव्हल’ मैदानावर खेळल्या गेलेल्या या सामन्यात, न्यूझीलंडने प्रथम फलंदाजी करताना 20 षटकांत 6 बाद 163 धावा केल्या. संघाने स्थिर सुरुवात केली आणि पॉवरप्लेच्या अखेरीस बिनबाद 44 धावांपर्यंत मजल मारली. कर्णधार अमेलिया केरने 42 धावांची महत्त्वपूर्ण खेळी केली, तर सोफी डिव्हाइनने अवघ्या 14 चेंडूत 30 धावा फटकावत धावगती वाढवली. मात्र, इंग्लंडने एकाही धावेची भर न पडता चार चेंडूंमध्ये तीन बळी घेत सामन्याचे चित्र पालटले. डॅनिएल गिब्सनने दोन झटपट बळी घेत न्यूझीलंडला 70 धावांत 3 बाद अशा कठीण स्थितीत आणले. ब्रूक हॅलिडे (20 धावा) आणि डिव्हाइन (25 चेंडूत 54 धावा) यांनी डाव सावरण्याचा प्रयत्न केला, परंतु त्या दोघी बाद होताच संघाची पुन्हा घसरगुंडी उडाली. अखेरीस, मॅडी ग्रीन 17 धावांवर नाबाद राहिली आणि सुझी बेट्सने 19 धावांचे योगदान दिले, ज्यामुळे न्यूझीलंडला 163 धावांचा टप्पा गाठता आला.
इंग्लंडकडून डॅनिएल गिब्सनने प्रभावी गोलंदाजी करत दोन बळी घेतले, 164 धावांच्या आव्हानाचा पाठलाग करताना इंग्लंड संघाने सुरुवातीपासूनच आक्रमक पवित्रा स्वीकारला. जरी एमी जोन्स 17 धावांवर बाद झाली असली तरी डॅनी वायट-हॉज आणि सोफिया डंकली यांनी न्यूझीलंडच्या पुनरागमनाच्या सर्व आशा मावळल्या.
डॅनी वायट-हॉजने 53 चेंडूत नाबाद 89 धावांची शानदार खेळी केली. या स्पर्धेतील तिचे हे तिसरे अर्धशतक ठरले. तिच्या या खेळीत 15 चौकार आणि एका षटकाराचा समावेश होता. त्याच वेळी, सोफिया डंकलीनेही उत्कृष्ट फलंदाजी करत 38 चेंडूत नाबाद 49 धावा केल्या. या जोडीने दुसऱ्या विकेटसाठी 100हून अधिक धावांची भागीदारी करत इंग्लंडला अवघ्या 17.2 षटकांत विजयाचे लक्ष्य गाठून दिले.
या विजयासह, साखळी फेरीतील पाचही सामने जिंकून इंग्लंडने उपांत्य फेरीत आपले स्थान निश्चित केले. याउलट, या पराभवामुळे न्यूझीलंडचे स्पर्धेतील आव्हान संपुष्टात आले. तत्पूर्वी, वेस्ट इंडीजला साखळी फेरीतील त्यांच्या अखेरच्या सामन्यात आयर्लंडकडून पराभव पत्करावा लागला होता; मात्र, न्यूझीलंडच्या पराभवाचा त्यांना फायदा झाला आणि अखेरीस त्यांनी उपांत्य फेरीतील स्थान मिळवले.
Comments are closed.