होर्मुझच्या सामुद्रधुनीतून तेलाची वाहतूक पूर्ववत, अमेरिका-इराण युद्धाच्या पार्श्वभूमीवर डोनाल्ड ट्रम्प यांचा मोठा दावा

अमेरिका आणि इराण यांच्यात सुरू असलेल्या युद्धाच्या पार्श्वभूमीवर अमेरिकेचे राष्ट्राध्यक्ष डोनाल्ड ट्रम्प यांनी एक मोठा दावा केला आहे. जागतिक तेल व्यापारासाठी अत्यंत महत्त्वाच्या मानल्या जाणाऱ्या होर्मुझच्या सामुद्रधुनीतून कच्च्या तेलाची वाहतूक आता पुन्हा एकदा पूर्ववत झाली असून, पुरवठा साखळी पूर्णपणे सामान्य झाली असल्याची माहिती ट्रम्प यांनी दिली आहे. इराणसोबतच्या संघर्षाच्या छायेतही अमेरिकेने या सागरी मार्गावर आपले वर्चस्व प्रस्थापित करून तेलाचा पुरवठा सुरळीत केल्याचे त्यांनी म्हटले आहे.

डोनाल्ड ट्रम्प म्हणाले आहेत की, अमेरिकन लष्कराने या सामुद्रधुनीवर पूर्ण नियंत्रण मिळवले असून आता दररोज लाखो बॅरल तेल सुरक्षितपणे या मार्गावरून वाहून नेले जात आहे. इराणकडून कोणताही अडथळा येऊ नये यासाठी अमेरिकन नौदलाने या संपूर्ण सागरी मार्गाची कसून तपासणी केली आहे. पाण्याखालील भूसुरुंग शोधून ते पूर्णपणे निकामी करण्यात आले आहेत. तसेच अमेरिकन सैन्याच्या कडक बंदोबस्तात व्यावसायिक जहाजे आणि तेल टँकर्सना सुरक्षित मार्गक्रमण करून दिले जात असल्याचेही ते म्हणाले आहेत.

इराणने हा मार्ग रोखण्याचा आणि अडथळे निर्माण करण्याचा प्रयत्न केला असला तरी, अमेरिकेच्या आक्रमक कारवाईमुळे त्यांचा हा मनसुबा उधळून लावण्यात आला आहे. होर्मुझच्या सामुद्रधुनीवर आता इराणचे नव्हे, तर अमेरिकेचे पूर्ण नियंत्रण असल्याचा दावा ट्रम्प यांनी केला. लष्कराच्या या यशस्वी कारवाईमुळे जागतिक बाजारात तेलाचा पुरवठा सुरळीत झाला असून, संभाव्य तेलटंचाईचे संकट टळले आहे. तसेच जगासाठी हा सागरी मार्ग आता अधिक सुरक्षित झाला असल्याचे ट्रम्प यांनी म्हटले आहे.