पोलिस चौकी बॉम्बने उडवली, पाकिस्तानात मोठा दहशतवादी हल्ला, जाणून घ्या किती जणांचा मृत्यू

नवी दिल्ली: पाकिस्तानच्या उत्तर-पश्चिम भागातील बन्नू येथे शनिवारी झालेल्या मोठ्या दहशतवादी हल्ल्याने पाकिस्तानच्या सुरक्षा व्यवस्थेवर गंभीर प्रश्न निर्माण केले आहेत. खैबर पख्तुनख्वा प्रांतातील या संवेदनशील भागात दहशतवाद्यांनी आधी पोलीस चौकीला लक्ष्य करत कार बॉम्बचा स्फोट केला आणि नंतर सुरक्षा जवानांवर हल्ला केला. प्राथमिक वृत्तानुसार, या हल्ल्यात किमान 15 पोलिसांचा मृत्यू झाल्याची भीती आहे. मात्र, या आकडेवारीची अद्याप पुष्टी झालेली नाही. दरम्यान, जाणून घेऊया काय आहे हे संपूर्ण प्रकरण?

हल्ला केव्हा आणि कुठे झाला?

मिळालेल्या माहितीनुसार, अफगाणिस्तान सीमेजवळ असलेल्या बन्नू जिल्ह्यात हा हल्ला झाला. पोलिस अधिकाऱ्यांनी सांगितले की, हल्लेखोर स्फोटकांनी भरलेले वाहन घेऊन पोलिस चौकीच्या मुख्य गेटवर पोहोचले आणि मोठा स्फोट घडवून आणला. हा स्फोट इतका भीषण होता की संपूर्ण चौकीचे नुकसान झाले आणि आजूबाजूच्या परिसरात गोंधळ उडाला.

मदत आणि बचाव कार्य सुरूच आहे

स्थानिक अधिकाऱ्यांनी दिलेल्या माहितीनुसार, त्यावेळी जवळपास 15 पोलीस चौकीवर तैनात होते. आतापर्यंत तीन पोलिसांच्या मृत्यूला अधिकृत दुजोरा मिळाला आहे, तर उर्वरित जवान ढिगाऱ्याखाली गाडले गेल्याची भीती व्यक्त केली जात आहे. मदत आणि बचाव कार्य सुरूच असून ऑपरेशन पूर्ण झाल्यानंतरच अंतिम आकडेवारी कळेल.

अचानक गोळीबार सुरू झाला

हल्ल्यानंतर दहशतवाद्यांनी अचानक जवळून मदतीसाठी आलेल्या पोलिसांवर गोळीबार सुरू केल्याने परिस्थिती अधिक गंभीर झाली. दोन्ही बाजूंच्या गोळीबारामुळे संपूर्ण परिसरात युद्धसदृश वातावरण निर्माण झाले होते. पोलिस अधिकाऱ्यांचे म्हणणे आहे की या हल्ल्यात एक आत्मघाती हल्लेखोर देखील सामील होता, ज्याने चेकपॉईंटजवळ बॉम्बने भरलेल्या वाहनाचा स्फोट केला.

हल्ल्याला जबाबदार कोण?

दहशतवाद्यांनी ड्रोनचा वापर केल्याचा दावाही अहवालात करण्यात आला असून त्यामुळे सुरक्षा यंत्रणांची चिंता आणखी वाढली आहे. जवळपासच्या काही घरांना आणि इमारतींनाही स्फोटाचा फटका बसला असून दोन नागरिक जखमी झाल्याची माहिती आहे. या घटनेनंतर बन्नूच्या रुग्णालयात आणीबाणी घोषित करण्यात आली आहे. सध्या कोणत्याही संघटनेने या हल्ल्याची जबाबदारी स्वीकारलेली नाही, मात्र यामागे पाकिस्तान तालिबान (टीटीपी) किंवा त्याच्याशी संबंधित दहशतवादी गट असू शकतात, असा संशय सुरक्षा यंत्रणांना आहे.