तोतया सीबीआय अधिकाऱ्याने पुणेकराला 42 लाखांचा चुना लावला! स्काईप ॲपवरून कॉल करुन म्हणाला…

पुणे: पुण्यात सीबीआय अधिकारी बोलत असल्याचे सांगत पुण्यात तरुणाची 42 लाख रुपयांची फसवणूक केल्याची घटना समोर आली आहे. बँक खाते व्हेरिफिकेशन करण्याच्या नावाखाली सायबर चोरट्यांनी लाखो रुपये उकळल्याचं प्रकरण उघडकीस आलं आहे. पुण्यातील उच्चभ्रू बाणेर परिसरातील तरुणाला सायबर चोरट्यांचा गंडा घातला आहे. तरुणावर सीबीआयचे 50 खटले दाखल असल्याची बतावणी केली. 23 वर्षीय तरुणाने या संदर्भात बाणेर पोलिस ठाण्यात तक्रार दिली आहे. यावरून संबंधित स्काईप वापरणाऱ्या मोबाईल क्रमांक धारक आणि इतर बँक खातेदारांवर गुन्हा दाखल करण्यात आला आहे. हा सगळा प्रकार मागील वर्षी सप्टेंबर महिन्यात घडल्याची माहिती आहे.

दिल्लीत अनेक खटले दाखल असल्याची धमकी

मिळालेल्या माहितीनुसार, फिर्यादी हे त्यांच्या मोबाईलवर स्काईप ॲप्लिकेशन वापरतात. या स्काईप ॲपवर त्यांना 2 सप्टेंबर 2024 रोजी एकाने संपर्क करून आपण दिल्ली केंद्रीय अन्वेषण विभाग म्हणजेच सीबीआय मधून बोलत असल्याचे सायबर चोरट्यांनी भासवले. या चोरट्यांनी फिर्यादी यांना त्यांच्या नावावर दिल्लीत अनेक खटले दाखल असल्याची धमकी दिली. तसेच सीबीआय अधिकारी तुमचा शोध घेत असल्याची सुद्धा बतावणी केली. यावर न थांबता या सायबर चोरट्यांनी फिर्यादी यांचा आधार कार्ड नंबर विचारून त्यांच्या आधार कार्डच्या नावावर 50 खटले असल्याचं सांगितलं. यावर फिर्यादी यांनी माझ्यावर कुठले ही खटले नसल्याचे सांगितल्यानंतर सायबर चोरट्यांनी त्याची शहानिशा करण्यासाठी फिर्यादी यांना बँक खात्याचे नंबर देण्यास सांगितले.

बँक खात्याची माहिती मिळाल्यानंतर सायबर चोरट्यांनी फिर्यादी यांना बँकेतील रक्कम दुसऱ्या खात्यावर ट्रान्स्फर करण्यासाठी सांगितली. सीबीआय अधिकारी बोलत असल्याचे वाटून फिर्यादी यांनी सांगितलेल्या विविध बँक खात्यांवर 42 लाख 95 हजार 637 रुपये ट्रान्स्फर केले. बँक खात्यातील सर्व रक्कम गेल्यानंतर आपली फसवणूक झाल्याचे लक्षात आल्यानंतर फिर्यादी यांनी स्काईप धारकाला संपर्क करण्याचा प्रयत्न केला मात्र त्यांना त्यांच्याकडून कुठले ही उत्तर आलं नाही. बाणेर पोलिस ठाण्यात याप्रकरणी फसवणुकीचा गुन्हा दाखल करण्यात आला आहे.

अधिक पाहा..