अखेर पुण्यातील दारुड्या पोलीस कॉन्स्टेबलला अटक; पोलीस दलातूनही निलंबन, एबीपी माझाच्या बातमीचा इ

पुणे : ABP माझाच्या बातमीचा परिणाम. पोलीस कॉन्स्टेबल (Police constable) हेमंत इनामे याला अखेर अटक करण्यात आली आहे, त्याचबरोबर पोलीस दलातूनही त्याचं निलंबन करण्यात आलं आहे. दारुच्या नशेत अनेक नागरिकांना चिरडणाऱ्या रांजणगाव पोलीस ठाण्यातील कॉनस्टेबल हेमंत इनामेला वाचवण्याचा प्रयत्न त्याच्या वरिष्ठांकडून होत होता. हा जामीनपात्र गुन्हा असल्याने इनामेला अटक करण्याची गरज नाही अशी भूमिका पोलीस अधिकाऱ्यांनी घेतली होती. मात्र एबीपी माझाने या अपघाताची भीषणता समोर आणल्यानंतर इनामेला अटक करण्याचे आदेश देण्यात आलेत आणि त्याच पोलीस दलातून निलंबन देखील करण्यात आलं आहे.(Police constable)

नशेतच त्याने कार चालवली, ताबा सुटल्याने सहा वाहनांना धडक

मिळालेल्या माहितीनुसार, रांजणगाव एमआयडीसी पोलिस ठाण्यात कार्यरत असलेला पोलीस कॉन्स्टेबल हेमंत इनामे याने दारूच्या नशेत वाहन चालवत सहा गाड्यांना जबरदस्त धडक दिल्याची धक्कादायक घटना उघडकीस आली आहे. या भीषण अपघातात अनेक नागरिक गंभीर जखमी झाले असून, काही वाहनांचे मोठ्या प्रमाणात नुकसान झाले आहे.मिळालेल्या माहितीनुसार, हेमंत इनामे रविवारी रात्री एका पार्टीस उपस्थित होता, जिथे त्याने मोठ्या प्रमाणात मद्यसेवन केल्याचे समजते. नशेतच त्याने कार चालवली आणि पुणे–नगर महामार्गावर गाडीवरील ताबा सुटल्याने सहा वाहनांना एकामागोमाग एक धडक दिली. अपघातात काहींना गंभीर दुखापत झाली असून, जखमींवर उपचार सुरू आहेत.

घटनेनंतर रांजणगाव पोलिसांनी केवळ गुन्हा दाखल केला आहे, मात्र आरोपी कॉन्स्टेबलला ना अटक करण्यात आली आहे, ना त्याची वैद्यकीय तपासणी करण्यात आली आहे. त्यामुळे प्रकरण दडपण्याचा प्रयत्न होत असल्याची चर्चा परिसरात सुरू आहे. या निष्क्रियतेमुळे नागरिकांमध्ये तीव्र संताप व्यक्त होत असून, “दारूच्या नशेत जीवाशी खेळ करणाऱ्या कॉन्स्टेबलवर कठोर कारवाई करावी,” अशी मागणी स्थानिक नागरिकांकडून होत आहे.

तरुणाच्या हाता-पायाला फ्रॅक्चर, पोटावर जखम

रांजणगाव पोलीस ठाण्यातील पोलीस कॉनस्टेबल हेमंत इनामे याने दारुच्या नशेत कारची धडक दिल्याने अनेकजण गंभीर जखमी झाले आहेत. या घटनेतील जखमींमध्ये बावीस वर्षांच्या अभिषेक पवार या तरुणाचा समावेश आहे. अभिषेकचा डावा पाय दोन ठिकाणी फ्रॅक्चर झाला असून त्याच्या छातीला आणि पोटाला ही गंभीर जखमा झाल्या आहेत. पुण्यातील एका हॉस्पीटलमधे अतिदक्षता विभागात त्याच्यावर उपचार सुरु आहेत. मात्र अपघाताचं हे प्रकरण दडपण्याचा प्रयत्न झाल्याचा अभिषेकच्या आईचा आणि नातेवाईकांचा आरोप आहे.

कॉन्स्टेबलच्या बायकोनेही कुटुंबाला फसवलं, उपचाराचे पैसे द्यायला नकार

अपघातानंतर पोलीस कॉनस्टेबल हेमंत इनामेचा फोन अपघातस्थळी सापडला होता. मात्र त्याच्या बायकोने उपचारांचा खर्च देण्याचे आश्वासन देऊन तो फोन ताब्यात घेतला. मात्र त्यानंतर उपचारांचा खर्च देण्यास नकार दिला. अभिषेकच्या उपचारांसाठी मोठा खर्च येणार असून तो देणं शक्य नसल्याचं त्याच्या आईने म्हटलंय. तर दुसरीकडे हा जामीनपात्र गुन्हा असल्याने यामधे पोलीस कॉन्स्टेबल हेमंत इनामेला अटक करण्याची गरज नाही असं पुणे ग्रामीण पोलीसांनी म्हटलं आहे.

https://www.youtube.com/watch?v=iit7hvodhqc

आणखी वाचा