पुण्यातील पोर्शे कार अपघात प्रकरणी पोलिसांचे न्यायालयात पत्र; खटला जलद चालवण्यासंदर्भात विनंती

पोर्श कार अपघात पुणे: पुण्यातील कल्याणीनगर भागात झालेल्या पोर्शे कार अपघात प्रकरणाने (Pune Porsche Case) राज्यासह देशभरात खळबळ उडाली होती. या प्रकरणामध्ये अनेक मोठे खुलासे समोर आले होते. अशातच आता या प्रकरणाबाबत नवी माहिती समोर आली आहे. ‘पोर्श’ कार अपघात प्रकरणाचा खटला जलदगतीने चालवण्यासाठी पुणे पोलिसांनी (Pune Crime News) न्यायालयात पत्र दाखल केलं आहे. या प्रकरणात अल्पवयीन कारचालकासह त्याच्या दोन अल्पवयीन मित्रांच्या रक्ताचे नमुने बदलून पुरावा नष्ट केल्याप्रकरणी आरोपी विरोधातील खटला जलदगतीने चालवावा, अशी विनती पुणे पोलिसांनी जिल्हा न्यायालय प्रशासनाकडे केली आहे.

पुणे पोलिसांचे न्यायालयात पत्र, नेमका आशय काय?

दरम्यान, या प्रकरणातील सर्व दहा आरोपीविरोधात आरोपपत्र दाखल केले आहे. आरोप निश्चितीसाठीचा मसुदाही विशेष सरकारी वकिलांनी दाखल केला आहे. तर बचाव पक्षातर्फे जामीन व निर्दोष मुक्ततेसाठीच्या अर्जावरील सुनावणी प्रलंबित असल्याने, आरोप निश्चिती करून खटल्याच्या सुनावणीला वेळ लागत आहे. या प्रकरणांमध्ये निर्दोष मुक्ततेसाठी आरोपी डॉक्टर अजय तावरे यांनी अर्ज केला आहे. त्यावर वीस तारखेला सुनावणी होणार आहे. तर आरोपी आदित्य सूद याची सुनावणी 19 मे रोजी होणारा आहे. या प्रकरणात शिवानी अग्रवाल हिला या अगोदर जामीन मंजूर करण्यात आला आहे. तर आरोपी विरोधात आरोप निश्चित करून कालबद्ध कार्यक्रम निश्चित करावा, असा अर्ज विशेष सरकारी वकील यांनी न्यायालयाकडे सादर केला आहे.

पुणे हादरवून टाकणाऱ्या पोर्श हिट अँड रन प्रकरण नेमकं काय?

पुण्यातील बांधकाम व्यावसायिकाच्या 17 वर्षाच्या अल्पवयीन मुलानं दारुच्या नशेत भरधाव वेगानं आलिशान पोर्शे गाडीने दुचाकीला धडक दिली होती. यामध्ये दोन आयटी अभियंत्यांचा जागीच मृत्यू झाला. अनिश अवधिया (27 वर्षे) आणि अश्विनी कोष्टा अशी अपघातामध्ये जागीच मृत्यू झालेल्यांची नावे होती. पुण्यातील कल्याणीनगरमध्ये झालेल्या अपघातात पोर्शे गाडीचा वेग इतका भरधाव होता की अश्विनी कोस्टा या 15 फूट दूर फेकली गेली.

त्यानंतर पोलिसांनी त्या अल्पवयीन आरोपीला ताब्यात घेतलं. पण आरोपी अल्पवयीन असल्याने त्याला बालन्याय मंडळासमोर उभं करण्यात आलं. बालन्याय मंडळाने त्या अल्पवयीन मुलाला 300 शब्दांचा निबंध लिहिण्याची आणि इतर काही थातूरमातून शिक्षा दिल्या आणि जामीन मंजूर केला होता.

कल्याणीनगर अपघात प्रकरणात पोर्शे कार चालक अल्पवयीन मुलाला घटनेच्या अवघ्या 15 तासात 300 शब्दांचा निबंध लेखनासह विविध अटी घालत जामीन मंजूर करण्यात आला होता. हा जामीन ज्यांनी दिला त्या बालन्याय मंडळाच्या दोन शासकीय सदस्यांवर शिस्तभांगाची कारवाई करण्याची शिफारस महिला आणि बालविकास विभागाने सरकारकडे केली होती. अल्पवयीन आरोपीच्या जामिनाच्या निर्णयावर देशभरातून तीव्र प्रक्रिया उमटल्या होत्या.

हे ही वाचा

अधिक पाहा..