नगरच्या राजकारणात विखे आणि गडाख ही दोन नावे म्हणजे दोन ध्रुव! वर्षानुवर्षे एकमेकांविरोधात राजकीय तलवारी उपसणाऱ्या या दोन घराण्यांमध्ये अचानक ‘गोडवा’ निर्माण झाल्याने जिल्ह्याच्या राजकीय वर्तुळात खळबळ उडाली आहे. पालकमंत्री राधाकृष्ण विखे यांनी माजी मंत्री शंकरराव गडाख यांच्या निवासस्थानी जाऊन घेतलेली भेट वरकरणी सदिच्छा भेट वाटत असली, तरी तिच्यामागे मोठा राजकीय हिशेब असल्याची चर्चा सुरू झाली आहे. विशेष म्हणजे भाजपचे प्रदेश उपाध्यक्ष सुजय विखे यांची या भेटीतील उपस्थिती या चर्चेला अधिकच धार देणारी ठरली आहे.
विखे-गडाख संघर्षाचा इतिहास नगर जिल्ह्यालाच नव्हे, तर महाराष्ट्राच्या राजकारणाला ठाऊक आहे. माजी मंत्री बाळासाहेब विखे आणि माजी खासदार यशवंतराव गडाख यांच्यातील राजकीय संघर्षाने एकेकाळी राज्याचे राजकारण ढवळून काढले होते. लोकसभा निवडणुकीतील संघर्षापासून न्यायालयीन लढाईपर्यंत गेलेला हा वाद नगरच्या राजकीय इतिहासातील अत्यंत गाजलेला अध्याय आहे. त्यामुळे त्या संघर्षाच्या सावलीत वाढलेल्या दोन घराण्यांमध्ये आज अचानक संवादाचे पूल बांधले जात असतील, तर त्याकडे केवळ योगायोग म्हणून पाहणे कठीण आहे.
'शत्रू'ला पूर्णविराम?
पालकमंत्री राधाकृष्ण विखे यांनी शंकरराव गडाख यांची भेट घेतली. यावेळी सुजय विखे आणि शंकरराव गडाख उपस्थित होते. तब्बल तासभर झालेल्या चर्चेत विविध राजकीय आणि जिल्ह्यातील प्रश्नांवर मनमोकळ्या चर्चा झाल्याचे सांगितले जात आहे. मात्र, राजकारणात अचानक होणाऱ्या भेटींना वेगळे अर्थ असतात. विशेषतः विखे आणि गडाख यांच्यासारख्या दोन राजकीय घराण्यांच्या बाबतीत तर या भेटीचा ‘राजकीय अर्थ’ शोधला जाणे साहजिकच आहे.
कालपर्यंत एकमेकांच्या राजकीय वाटेतील काटे ठरलेले गट आज एकमेकांच्या दारी का पोहोचले? हा प्रश्न सध्या नगरच्या राजकीय कट्ट्यांवर चर्चिला जात आहे.
जिल्हा बँकेच्या राजकारणाचा ‘केंद्रबिंदू’?
या भेटीचा सर्वाधिक संबंध जिल्हा मध्यवर्ती सहकारी बँकेच्या राजकारणाशी जोडला जात आहे. जिल्हा बँकेतील सत्तासमीकरणे सध्या चांगलीच ढवळून निघाली आहेत. सहकार क्षेत्रातील प्रत्येक गट आपापली ताकद वाढविण्यासाठी मोर्चेबांधणी करीत असताना नव्या राजकीय समीकरणांची जुळवाजुळव सुरू आहे.
सभापती राम शिंदे यांनी शंकरराव गडाख यांची भेट घेतल्यानंतर राजकीय चर्चांना उधाण आले होते. त्यानंतर आता विखे यांनी गडाखांच्या दारी जाऊन भेट घेतल्याने या घडामोडींना आणखी वेग आला आहे. त्यामुळे जिल्हा बँकेच्या सत्तेभोवती कोणते नवे समीकरण आकाराला येणार, हा प्रश्न उपस्थित झाला आहे.
राजकारणात ‘मित्राचा मित्र’ आणि ‘शत्रूचा शत्रू’ या समीकरणांना महत्त्व असते. जिल्हा बँकेच्या राजकारणात कोण कोणासोबत उभे राहणार, कोण कोणाला साथ देणार आणि कोणाचा काटा काढण्यासाठी कोणता गट कोणाशी हातमिळवणी करणार, यावरच आगामी राजकीय चित्र अवलंबून राहणार आहे.
राम शिंदेंच्या खेळीला विखेंचा प्रतिडाव?
राम शिंदे यांनी गडाखांची भेट घेतल्यानंतर विखे गटही सावध झाल्याची चर्चा आहे. भाजपच्या अंतर्गत राजकारणातही या हालचालींचे वेगवेगळे अर्थ काढले जात आहेत. त्यामुळे गडाखांशी संवाद साधून विखे यांनी एकाच वेळी अनेक राजकीय संदेश देण्याचा प्रयत्न केला आहे का, असा सवाल उपस्थित होत आहे.
एका बाजूला जिल्हा बँकेतील समीकरणे, दुसऱ्या बाजूला भाजपमधील अंतर्गत हालचाली आणि तिसऱ्या बाजूला आगामी लोकसभा-विधानसभा निवडणुकांची तयारी—या तिन्हींचा मेळ या भेटीत आहे का, याबाबत आता राजकीय तर्कवितर्कांना उधाण आले आहे.
नेवासा ‘कळीचा’ ठरणार?
शिर्डी लोकसभा मतदारसंघाच्या भविष्यातील राजकारणात नेवासा विधानसभा मतदारसंघाचे महत्त्व मोठे आहे. शंकरराव गडाख यांचा नेवासा मतदारसंघातील प्रभाव लक्षात घेता सुजय विखे यांच्या भविष्यातील लोकसभा राजकारणासाठी गडाखांशी जुळवून घेणे ही राजकीयदृष्ट्या फायदेशीर चाल ठरू शकते, अशी चर्चा आहे.
म्हणूनच विखे-गडाख भेटीकडे केवळ जिल्हा बँकेच्या चष्म्यातून पाहणे पुरेसे नाही. आगामी काळात शिर्डी लोकसभा मतदारसंघात सुजय विखे यांचे राजकीय भवितव्य मजबूत करण्यासाठी नेवासा हा महत्त्वाचा दुवा ठरू शकतो. त्यासाठी आजवरचा राजकीय वैरभाव बाजूला ठेवून नवी समीकरणे जुळवण्याचा प्रयत्न सुरू झाला आहे का, याची उत्सुकता आहे.
‘विखे विरुद्ध गडाख’ अध्याय संपणार?
नगरच्या राजकारणात विखे विरुद्ध गडाख हा संघर्ष एक स्वतंत्र राजकीय अध्याय राहिला आहे. पिढ्यान्पिढ्या या संघर्षाने जिल्ह्याच्या राजकारणावर प्रभाव टाकला. मात्र, आता त्याच संघर्षाला ब्रेक लावण्याचा प्रयत्न होत असेल, तर त्याचे परिणामही तितकेच मोठे असणार आहेत.
राजकारणात कायमचे मित्र किंवा कायमचे शत्रू नसतात, हे पुन्हा एकदा सिद्ध होण्याची चिन्हे दिसत आहेत. कालपर्यंत एकमेकांविरोधात उभे ठाकलेले विखे आणि गडाख आज एकाच टेबलावर बसत असतील, तर उद्या कोणते नवे समीकरण तयार होईल, हे सांगणे कठीण आहे.
सध्या मात्र पालकमंत्री विखे यांची गडाखांच्या दारी झालेली भेट ही नगरच्या राजकारणातील साधी भेट राहिलेली नाही. जिल्हा बँक, नेवासा, शिर्डी लोकसभा आणि भाजपमधील अंतर्गत राजकारण या सर्व धाग्यांना एकत्र जोडणारा हा नवा राजकीय ‘डाव’ आहे का, याचीच चर्चा रंगली आहे. विखे-गडाखांचे जुने वैर संपविण्याची ही सुरुवात आहे की मोठ्या राजकीय खेळीपूर्वीची ही केवळ ‘राजकीय सलामी’, याचे उत्तर आगामी घडामोडींमध्येच मिळणार आहे.
Comments are closed.