ज्ञानेश कुमार यांना पद्मविभूषण द्या म्हणणाऱ्यांचा मेंदू नॅशनल म्युझियममध्ये ठेवावा, संजय राऊत यांचा टोला
केंद्रीय निवडणूक आयोगातील मतभेद आणि भ्रष्टाचार चव्हाट्यावर आल्यानंतर मुख्य निवडणूक आयुक्त ज्ञानेश कुमार यांच्या राजीनाम्याची मागणी होत आहे. विरोधक आक्रमक झालेले असताना पश्चिम बंगाल भाजपचे प्रदेशाध्यक्ष समिक भट्टाचार्य ज्ञानेश कुमार यांना पद्मभूषण किंवा पद्मविभूषण पुरस्कार देण्यात यावा, अशी मागणी केली आहे. यावरून आता शिवसेना नेते, खासदार संजय राऊत यांनी भाजपवर तोफ डागली असून हा देश, देशातील लोकशाही खड्ड्यात घातल्याबद्दल ज्ञानेश कुमार यांनी भारतरत्नच द्या आणि ज्ञानेश कुमार यांना पद्मविभूषण द्या म्हणणाऱ्यांचा मेंदू नॅशनल म्युझियममध्ये ठेवा, असा टोला लगावला. ते शनिवारी सकाळी मुंबईत माध्यमांशी बोलत होते.
संजय राऊत म्हणाले की, हा देश, देशातील लोकशाही खड्ड्यात घातल्याबद्दल, लोकशाहीची हत्या केल्याबद्दल, तसेच कोट्यवधी मतदारांचा संविधानाने दिलेला मतदानाचा अधिकार हुकुमशाही पद्धतीने काढून घेतल्याबद्दल आणि मनमानी केल्याबद्दल भाजप लोकशाहीचा दुष्मन नंबर एक ज्ञानेश कुमार यांना पद्मविभूषण द्या म्हणत असेल तर अशी मागणी करणाऱ्याचा मेंदू दिल्लीच्या नॅशनल म्युझियममध्ये ठेवला पाहिजे. पद्मविभूषण कशाला, थेट भारतरत्नच द्या किंवा घोटाळेबाज निवडणूक आयुक्तांना नोबेल पुरस्कार मिळावा अशी शिफारस करा.
Comments are closed.