Shame On… मुंबईच्या या खेळाडूला न खेळवणं म्हणजे लाजिरवाणं; निवड समितीवर दिग्गजांचा संताप, नको

Dilip Vengsarkar on Sarfaraz Khan : मुंबईकडून खेळणारा सरफराज खान सध्या जबरदस्त फॉर्ममध्ये आहे. त्याच्या प्रभावी आकडेवारी असूनही, त्याला 2025 मध्ये मर्यादित संधी मिळाल्या. अनेक क्रिकेट तज्ञांनी त्याच्या निवडीवर प्रश्नचिन्ह उपस्थित केले होते आणि आता माजी भारतीय कर्णधार दिलीप वेंगसरकर यांचाही या यादीत समावेश झाला आहे. त्याने सरफराजला संधी न दिल्याबद्दल निवड समितीवर टीका केली आहे. दिलीप वेंगसरकर यांनी बीसीसीआयच्या निवड समितीवर थेट सवाल उपस्थित केले आहेत. त्यांच्या मते, सरफराज खान याला सातत्याने दुर्लक्षित केलं जात आहे, जे अत्यंत धक्कादायक आणि अन्यायकारक आहे.

सरफराजने देशांतर्गत क्रिकेटमध्ये सातत्याने दमदार कामगिरी केली आहे. भारतासाठी जेव्हा-जेव्हा संधी मिळाली, तेव्हा त्याने धावा केल्या. तरीही त्याला प्रत्येक हंगामात संघात स्थान मिळवण्यासाठी संघर्ष करावा लागला. अखेर 2023 मध्ये इंग्लंडविरुद्ध त्याला कसोटी पदार्पणाची संधी मिळाली.

संघातून ड्रॉप, तरीही दुर्लक्ष

मात्र, 2024-25 बॉर्डर-गावसकर ट्रॉफीमध्ये सरफराजला संघाबाहेर ठेवण्यात आलं. त्यानंतर त्याने फिटनेसवर विशेष मेहनत घेतली, वजन कमी केलं आणि तो उत्तम फॉर्ममध्ये परतला. असे असतानाही वेस्टइंडीज आणि दक्षिण आफ्रिकेविरुद्धच्या घरच्या कसोटी मालिकेत त्याला पुन्हा डावलण्यात आलं. यामुळे निवड प्रक्रियेवर गंभीर प्रश्नचिन्ह निर्माण झालं आहे.

आकडेही सरफराजच्या बाजूने

सरफराजने भारतासाठी आतापर्यंत 6 कसोटी सामने खेळले असून 371 धावा, 37.10 ची सरासरी, यामध्ये 1 शतक आणि 3 अर्धशतकांचा समावेश आहे. वेंगसरकर यांनी या आकडेवारीकडे लक्ष वेधत म्हटलं की, “मला समजत नाही की इतकं सातत्यपूर्ण प्रदर्शन करूनही सरफराजला कोणत्याही फॉरमॅटमध्ये संधी का दिली जात नाही.”

वेंगसरकर यांनी इंग्लंडविरुद्ध धर्मशालात झालेल्या कसोटीत सरफराज आणि देवदत्त पडिक्कल यांच्यातील महत्त्वपूर्ण भागीदारीचाही उल्लेख केला.“मी त्या दोघांना एकत्र फलंदाजी करताना पाहिलं आहे. तो सामना भारत जिंकण्याच्या दृष्टीने फार महत्त्वाचा सत्र होता. त्यांनी अत्यंत सुंदर फलंदाजी केली आणि निर्णायक भागीदारी उभी केली.”

विजय हजारेत धडाकेबाज फॉर्म

सध्याच्या विजय हजारे ट्रॉफीत सरफराजने जबरदस्त सुरुवात केली आहे. फक्त 3 डावांत 220 धावा, यामध्ये गोव्याविरुद्ध 75 चेंडूंमध्ये 157 धावांची तुफानी खेळी समाविष्ट आहे. वेंगसरकर यांनी स्पष्ट शब्दांत नाराजी व्यक्त करत म्हटलं, “इतकी मोठी प्रतिभा दुर्लक्षित केली गेली आहे. ऑस्ट्रेलिया दौऱ्यावर तो संघात होता, पण त्याला एकही संधी मिळाली नाही. तो सर्व फॉरमॅटमध्ये खेळू शकणारा खेळाडू आहे. अशा खेळाडूकडे दुर्लक्ष होणं अत्यंत लाजिरवाणं आहे.”

हे ही वाचा –

Ind Squad vs Nz ODI Series : मोहम्मद शमी IN, जसप्रीत बुमराह OUT…; न्यूझीलंडविरुद्धच्या वनडे मालिकेसाठी असा असेल टीम इंडियाचा Squad

आणखी वाचा