भारतीय महिला क्रिकेट संघाची उपकर्णधार आणि स्टार सलामीवीर स्मृती मानधनाची बॅट मंगळवारी (22 सप्टेंबर) आशियाई क्रीडा स्पर्धा 2026 च्या अंतिम सामन्यात चांगलीच चालली. श्रीलंकेविरुद्धच्या या सामन्यात तिने 45 चेंडूंत 5 चौकार आणि सात षटकारांच्या सहाय्याने 79 धावा केल्या. यादरम्यान तिने आंतरराष्ट्रीय क्रिकेटमध्ये एका मोठ्या विक्रमाची नोंद केली.
स्मृतीने श्रीलंकेविरुद्ध जे अर्धशतक केले, ते तिच्या टी 20 आंतरराष्ट्रीय कारकिर्दीतील 37 वे अर्धशतक ठरले. या खेळीदरम्यान तिने 11000 आंतरराष्ट्रीय धावाही पूर्ण केल्या. आंतरराष्ट्रीय क्रिकेटमध्ये 11000 धावांचा टप्पा गाठणारी ती पहिली महिला क्रिकेटपटू ठरली. याच महिन्याच्या सुरूवातीला तिने महिलांच्या आंतरराष्ट्रीय क्रिकेटमधील सर्वाधिक धावांचा मिताली राजचा (10868) धावांचा विक्रम मोडला होता. आता स्मृतीच्या नावावर 11066 धावा आहेत.
या सामन्यात स्मृतीचे शतक हुकले असले, तरी तिने भारतीय पुरुष संघाचा अनुभवी फलंदाज विराट कोहलीच्या मोठ्या विक्रमाची बरोबरी केली आहे. ती टी 20 आंतरराष्ट्रीय क्रिकेटमध्ये (पुरुष आणि महिला) संयुक्तपणे सर्वाधिक वेळा पन्नासपेक्षा अधिक धावा करणारी भारतीय खेळाडू ठरली आहे.
स्मृतीने आपल्या टी 20 आंतरराष्ट्रीय कारकिर्दीत 39 वेळा पन्नासपेक्षा अधिक धावा केल्या आहेत. तिने आतापर्यंत 179 टी 20 आंतरराष्ट्रीय सामने खेळताना 37 अर्धशतके आणि दोन शतके केली आहेत. विराटने भारतासाठी 125 टी 20 सामने खेळताना 38 अर्धशतके आणि एक शतक झळकावले आहे. या यादीत रोहित शर्मा तिसऱ्या स्थानी आहे. त्याने भारतासाठी 159 टी 20 सामने खेळले असून त्यामध्ये पाच शतके आणि 35 अर्धशतके केली.
Comments are closed.