श्रेयस अय्यरच्या नेतृत्वाखालील भारतीय संघाने मंगळवारी जपानविरुद्धच्या ऐतिहासिक टी-20 सामन्यात दोन धावांनी रोमांचक विजय मिळवला. भारत आणि जपान यांच्यातील हा पहिलाच आंतरराष्ट्रीय क्रिकेट सामना होता. सानो क्रिकेट मैदानावर झालेल्या या सामन्यानंतर, आयसीसीने (ICC) टी-20 आंतरराष्ट्रीय संघांची क्रमवारी जाहीर केली. भारताने इंग्लंडला मागे टाकत पुन्हा एकदा अव्वल स्थान पटकावले आहे. सध्या दोन्ही संघांकडे 269 रेटिंग गुण आहेत. श्रीलंकेविरुद्धची टी-20 मालिका जिंकल्यानंतर इंग्लंडने काही दिवसांपूर्वीच भारताकडून अव्वल स्थान हिरावून घेतले होते, परंतु श्रेयस अय्यरच्या संघाने आता पुन्हा एकदा ‘नंबर वन’चे स्थान मिळवले आहे.
भारत आणि इंग्लंडनंतर ऑस्ट्रेलिया 260 गुणांसह तिसऱ्या स्थानावर आहे. न्यूझीलंड 247 गुणांसह चौथ्या, तर दक्षिण आफ्रिका 243 गुणांसह पाचव्या स्थानावर आहे. पाकिस्तान 240 गुणांसह सहाव्या स्थानावर आहे. त्यानंतर वेस्ट इंडिज, बांगलादेश, श्रीलंका आणि अफगाणिस्तान हे संघ अनुक्रमे सातव्या, आठव्या, नवव्या आणि दहाव्या स्थानावर आहेत. आयर्लंड 205 गुणांसह 11 व्या आणि झिम्बाब्वे 202 गुणांसह 12 व्या स्थानावर आहे. सध्या आयसीसीमध्ये 12 ‘पूर्ण सदस्य’ (Full Member) देश आहेत. दरम्यान, जपान 74 गुणांसह टी-20 आंतरराष्ट्रीय क्रमवारीत 41 व्या स्थानावर आहे.
भारत-जपान सामन्यावर पावसाचे सावट होते, त्यामुळे हा सामना पाच षटकांचा करण्यात आला. भारताने चार गडी गमावून 32 धावा केल्या, जी अपेक्षा होती त्यापेक्षा कमी धावसंख्या होती. कारण खेळपट्टीवरून जपानच्या फिरकी गोलंदाजांना चेंडू वळवण्यास चांगली मदत मिळत होती. तरीही, भारतीय गोलंदाजांनी जपानला कोणताही मोठा उलटफेर करू दिला नाही. जपानला तीन गडी गमावून 30 धावाच करता आल्या आणि भारताने हा सामना दोन धावांनी जिंकला.
Comments are closed.