हिमंता बिस्वा सरमांकडेच आसामची धुरा; भाजप विधिमंडळ पक्षाच्या बैठकीत शिक्कामोर्तब

हिमंता बिस्व सरमा: हिमंता बिस्वा सरमा हे आसामचे पुढील मुख्यमंत्री असतील. भाजप विधिमंडळ पक्षाच्या बैठकीत त्यांच्या नावाला मंजुरी देण्यात आली. जे. पी. नड्डा यांनी त्यांच्या नावाची घोषणा केली. हिमंता 12 मे रोजी सकाळी 11 वाजता सलग दुसऱ्यांदा राज्याच्या मुख्यमंत्रीपदाची शपथ घेतील. 4 मे रोजी जाहीर झालेल्या निकालांनुसार, भाजपने राज्यातील 126 पैकी 82 जागा जिंकून दणदणीत विजय मिळवला होता. शपथविधी सोहळ्याला पंतप्रधान नरेंद्र मोदी, भाजपचे वरिष्ठ नेतृत्व आणि एनडीएचे अनेक ज्येष्ठ नेते उपस्थित राहणार आहेत. हिमंता यांचा हा राज्याभिषेक ईशान्य भारतात पक्षाचा प्रभाव आणखी मजबूत करणारा मानला जात आहे.

यासाम भाजपचे अध्यक्ष दिलीप सैकिया म्हणाले, “आम्ही दुपारपर्यंत सरकार स्थापन करण्याच्या आमच्या दाव्याबद्दल राज्यपालांना कळवू. 12 तारखेला होणाऱ्या शपथविधी सोहळ्याची तयारी सुरू आहे. हा एक ऐतिहासिक क्षण असेल, कारण पंतप्रधान मोदींच्या उपस्थितीत हिमंता 102 आमदारांसोबत शपथ घेतील.”

मुस्लिमबहुल जागा 36 टक्क्यांनी कमी झाल्या

2023 मध्ये आसाममध्ये मतदारसंघ पुनर्रचना झाली, ज्यामध्ये विधानसभा जागांच्या सीमा नव्याने आखण्यात आल्या. अनुसूचित जमाती (ST) आणि अनुसूचित जाती (SC) यांच्यासाठी राखीव जागा आणि बोडोलँड आदिवासी प्रदेशातील जागा वाढल्या, परंतु मुस्लिमबहुल जागा 41 वरून 26 पर्यंत कमी झाल्या. 2011 च्या जनगणनेनुसार, आसामच्या लोकसंख्येत मुस्लिमांचे प्रमाण 34 टक्के होते. आताच्या अंदाजानुसार हे प्रमाण जवळपास 40 टक्क्यांपर्यंत पोहोचले आहे. तरीही, त्यांच्या जागा कमी झाल्या आहेत. भाजपने नॉर्थ-ईस्ट डेमोक्रॅटिक अलायन्ससोबत निवडणूक लढवली. भाजपच्या 90 उमेदवारांमध्ये एकही मुस्लिम उमेदवार नव्हता. मित्रपक्षांनी 36 पैकी 13 मुस्लिम उमेदवार उभे केले. दुसरीकडे, काँग्रेसच्या नेतृत्वाखालील महाजोत आघाडीने 22 मुस्लिम उमेदवार उभे केले.

राजकीय विश्लेषकांच्या मते, “नवीन सीमांमुळे मुस्लिमबहुल भागांचा प्रभाव मर्यादित झाला आणि ज्या जागांवर आसामी मुस्लिमांची संख्या कमी होत होती, त्या जागांची पुनर्रचना झाली.” यामुळे ज्या जागांवर भाजप पूर्वी कमकुवत होता, तिथे हिमंता यांना फायदा झाला.

काँग्रेस आणि एआययूडीएफमध्ये मुस्लिम मतांची विभागणी

2021 मध्ये, काँग्रेस आणि बदरुद्दीन अजमल यांच्या एआययूडीएफने एकत्र निवडणूक लढवली होती. त्यांना 89 टक्के बंगाली मुस्लिम मते आणि 65 टक्के आसामी मुस्लिम मते मिळाली होती. 2026 मध्ये, हे दोन्ही गट स्वतंत्रपणे लढले. मुस्लिम मतांची विभागणी करून विरोधी पक्षांची आघाडी कमी करण्याकडे भाजपचा कल होता. भाजपने आसाममधील स्थानिक मुस्लिमांनाही आकर्षित करण्याचा प्रयत्न केला. हिमंता मुस्लिम समाजात दोन गट निर्माण करण्यात यशस्वी झाले आहेत. प्रथम, त्यांनी बांगलादेशातून आलेल्या ‘मिया मुस्लिमांना’ आसामी मुस्लिमांसाठी धोका असल्याचे म्हटले. त्यानंतर, आसामी मुस्लिमांना विशेष दर्जा देऊन त्यांना आपल्या गटात सुरक्षित केले.

इतर महत्वाच्या बातम्या

आणखी वाचा