मिर्झापूर, 22 एप्रिल. उत्तर प्रदेशातील मिर्झापूर जिल्ह्यात बुधवारी रात्री उशिरा एका अनियंत्रित ट्रकने बोलेरो, कार आणि कंटेनरला मागून धडक दिली. या भीषण अपघातात 11 जणांचा मृत्यू झाल्याची माहिती समोर येत आहे.
मिळालेल्या माहितीनुसार, ट्रकची धडक बसताच बोलेरोने पेट घेतला, त्यामुळे त्यातील प्रवाशांना बाहेर पडण्याची संधीही मिळाली नाही आणि गाडीतील सहा जणांचा होरपळून मृत्यू झाला.
पोलीस अधीक्षक अपर्णा रजत कौशिक यांनी घटनास्थळ गाठून घटनेची माहिती घेतली. अपघातात 11 जणांचा मृत्यू झाल्याची अधिकृतरीत्या त्यांनी पुष्टी केली. अपघाताच्या कारणांची कसून चौकशी करण्यात येत असल्याचे त्यांनी सांगितले. प्राथमिक माहितीनुसार, ट्रकचा अनियंत्रित वेग आणि चालकाचा निष्काळजीपणा हे या अपघाताचे प्रमुख कारण ठरले आहे.
या अपघातात ट्रक चालकासह अनेक जण जखमी झाले असून, त्यांना स्थानिक लोक आणि पोलिसांच्या मदतीने रुग्णालयात दाखल करण्यात आले असून, त्यांच्यावर उपचार सुरू असल्याचे पोलीस अधीक्षकांनी सांगितले. मात्र बोलेरोमध्ये प्रवास करणाऱ्या लोकांमध्ये कोणाचाही जीव वाचू शकला नाही. अपघाताची माहिती मृतांच्या नातेवाईकांना देण्यात आली असून त्यांचे मृतदेह शवविच्छेदनासाठी पाठवण्यात आले आहेत.
मिळालेल्या माहितीनुसार, रात्री उशिरापर्यंत पोलीस घटनास्थळी तैनात होते आणि बाधित रस्त्यावरील वाहतूक पूर्ववत करण्याचे प्रयत्न करत होते. ट्रक चालवताना ट्रक चालकाचे नियंत्रण का सुटले याचा शोध घेण्याचा प्रयत्न पोलीस करत आहेत.
Comments are closed.