वैष्णवी हगवणे आत्महत्या प्रकरण, अजितदादांचा पदाधिकारी राजेंद्र हगवणेच्या पत्नी, मुलाला अटक

पुणे : अजित पवारांच्या राष्ट्रवादीचा पुण्यातील पदाधिकारी राजेंद्र हगवणे यांच्या सूनेच्या आत्महत्या प्रकरणात तिघांना अटक करण्यात आली आहे. राजेंद्र हगवणे यांच्या पत्नी, मुलगा आणि मुलगी यांना या प्रकरणात अटक केली आहे. तर राजेंद्र हगवणे आणि त्यांचा दुसरा मुलगा फरार आहे. वैष्णवी हवगणे यांनी 16 मे रोजी आत्महत्या केली आहे.

जमीन खरेदीसाठी विवाहितेचा शारीरिक आणि मानसिक छळ करून तिच्या मृत्यूस कारणीभूत ठरल्याप्रकरणी वैष्णवी हगवणे याचे पती, सासू आणि नणंद यांना अटक करण्यात आली आहे. या तिघांना 21 मे पर्यंत पोलिस कोठडीत ठेवण्याचे आदेश न्यायालयाने दिले आहेत.

Rajendra Hagawane NCP : राजेंद्र हगवणे राष्ट्रवादीचा पदाधिकारी

वैष्णवी हगवणे यांचा पती शशांक, सासू लता, नणंद करिष्मा अशी पोलीस कोठडीत रवानगी केलेल्यांची नावे आहेत. सासरा राजेंद्र हगवणे आणि दीर सुशील हगवणे हे पसार आहेत. राजेंद्र हगवणे राष्ट्रवादी अजित पवार गटाचा राज्य कार्यकारिणी सदस्य आहे.

वैष्णवी हगवणेचे वडील आनंद कस्पटे यांनी दिलेल्या फिर्यादीनुसार वैष्णवी हिचा पती, सासू-सासरे नणंद आणि दीर यांनी हुंड्यासाठी मानसिक, शारीरिक छळ करून वैष्णवीला क्रूर वागणूक दिली. तिच्या मृत्यूस कारणीभूत ठरले.  तिच्या अंगावर मारहाणीचे व्रण आढळून आले.

या प्रकरणात सध्या हुंडाबळी आणि मृत्यूस कारणीभूत या कलमांतर्गत गुन्हा दाखल केला आहे. व्हिसेरा राखून ठेवला असून तपासात काही निष्पन्न झाल्यास त्यानुसार कलमवाढ करण्यात येईल अशी माहिती बावधन पोलिसांनी दिली.

Vaishanvi Hagawane Suicide : त्रासाला कंटाळून गळफास घेतला

पोलिसांनी दिलेल्या माहितीनुसार, वैष्णवी हगवणे यांनी शुक्रवारी (16 मे) घरात बेडरूमचा दरवाजा आतून बंद करून गळफास घेतला. काही वेळानंतर पती शशांक यांनी दरवाजा वाजवला. मात्र दरवाजा न उघडल्याने त्यांनी तो दरवाजा तोडला. त्यानंतर ही घटना समोर आली. वैष्णवी यांना रुग्णालयात दाखल करण्यात आले. मात्र उपचारापूर्वीच त्यांचा मृत्यू झाल्याचे डॉक्टरांनी घोषित केले. पुण्यातील ससून रुग्णालयात शवविच्छेदन करण्यात आले.

दरम्यान, वैष्णवी यांचे वडील आनंद कस्पटे यांनी दिलेल्या फिर्यादीत नमूद आहे की, वैष्णवीचा पती, सासू-सासरे, नणंद आणि दीर यांनी हुंड्यासाठी मानसिक, शारीरिक छळ करून क्रूर वागणूक दिली. मारहाण व जाच करून तिच्या मृत्यूस ते कारणीभूत ठरले आहेत.

या घटनेने परिसरात खळबळ उडाली असून पोलीस तपास करत आहेत. राजेंद्र हगवणे हे राष्ट्रवादी काँग्रेस अजितदादा पवार यांच्या पक्षाचे पदाधिकारी आहेत. त्यांच्यावर गुन्हा दाखल झाल्याने एकच खळबळ उडाली आहे.

ही बातमी वाचा:

अधिक पाहा..