ज्वालामुखी : इंडोनेशियातील प्रसिद्ध अनाक क्राकाटोआ ज्वालामुखीमध्ये अचानक शक्तिशाली स्फोट झाला. या स्फोटानंतर आकाशात प्रचंड प्रमाणात राख आणि धुराचे ढग पसरले. अधिकाऱ्यांनी दिलेल्या माहितीनुसार, ज्वालामुखीतून निघणारे दोन मोठे राखेचे ढग सुमारे 20 हजार ते 50 हजार फूट उंचीवर पोहोचले. वाऱ्यासह अनेक किलोमीटरपर्यंत राख पसरली, त्यामुळे आजूबाजूच्या परिसरावर तसेच हवाई सेवेवर गंभीर परिणाम झाला. राजधानी जकार्तासह सहा प्रमुख विमानतळ सुरक्षेच्या कारणास्तव तात्पुरते बंद करण्यात आले.
301 उड्डाणे प्रभावित, प्रवासी चिंतेत
ज्वालामुखीच्या उद्रेकामुळे एकूण 301 उड्डाण सेवा प्रभावित झाल्या, त्यात 58 आंतरराष्ट्रीय उड्डाणे समाविष्ट आहेत. ज्वालामुखीची राख विमानाच्या इंजिनमध्ये गेल्यास गंभीर धोका निर्माण होऊ शकतो. त्यामुळे प्रवाशांच्या सुरक्षेचा विचार करून अधिकाऱ्यांनी अनेक उड्डाणे तात्पुरती थांबवली. या घटनेनंतर परिसरातील नागरिकांमध्ये भीतीचे वातावरण आहे.
2018 च्या शोकांतिकेने चिंता वाढवली (ज्वालामुखी)
अनाक क्राकाटोआचे नाव 2018 च्या एका मोठ्या शोकांतिकेशीही जोडले गेले आहे. त्यावेळी ज्वालामुखीचा उद्रेक झाल्यानंतर समुद्रात आलेल्या शक्तिशाली त्सुनामीमध्ये 430 हून अधिक लोकांनी आपला जीव गमावला होता. ही जुनी दुर्घटना पाहता यावेळी प्रशासनाने किनारी भागात राहणाऱ्या नागरिकांना सावध राहण्याचा सल्ला दिला आहे. अधिकाऱ्यांच्या देखरेखीखाली ज्वालामुखीच्या हालचालींवर सतत लक्ष ठेवले जात आहे.
Comments are closed.