इराणचे नाव जगाच्या नकाशावरून मिटवून टाकेन; होर्मुझच्या समुद्रात अमेरिकन जहाजांवर झालेल्या हल्ल्यानंतर ट्रम्प यांचा इशारा

अमेरिकेचे राष्ट्राध्यक्ष डोनाल्ड ट्रम्प यांनी इराणला अत्यंत कठोर शब्दांत इशारा दिला आहे. होर्मुझच्या सामुद्रधुनीतून  जाणाऱ्या जहाजांना सुरक्षा पुरवणाऱ्या अमेरिकन जहाजांवर जर इराणने हल्ला केला, तर इराणचे नाव पृथ्वीच्या नकाशावरून मिटवून टाकू, असे ट्रम्प यांनी म्हटले आहे.

इराणने होर्मुझच्या सामुद्रधुनीतून प्रवास करणाऱ्या काही जहाजांवर कथितपणे हल्ले केले आहेत. ही जहाजे ट्रम्प यांच्या निर्देशावरून अमेरिकन सेंट्रल कमांडने सुरू केलेल्या प्रोजेक्ट फ्रीडम अंतर्गत या भागातून जात होती. या पार्श्वभूमीवर ‘फॉक्स न्यूज’शी बोलताना ट्रम्प यांनी हे विधान केले. २८ फेब्रुवारीपासून इराणसोबत युद्ध सुरू झाल्यामुळे हा सागरी मार्ग बंद आहे. ट्रम्प यांनी आपल्या ‘ट्रुथ सोशल’ या प्लॅटफॉर्मवर असा दावा केला आहे की, इराणने दक्षिण कोरियाच्या मालवाहू जहाजासह इतर काही जहाजांना लक्ष्य केले आहे.

दक्षिण कोरियाच्या सहभागाबाबत बोलताना ट्रम्प म्हणाले की, “इराणने प्रोजेक्ट फ्रीडम अंतर्गत प्रवास करणाऱ्या इतर देशांच्या जहाजांना लक्ष्य केले आहे, ज्यामध्ये दक्षिण कोरियाच्या जहाजाचाही समावेश आहे. त्यामुळे कदाचित आता दक्षिण कोरियाने या मिशनमध्ये सामील होण्याची वेळ आली आहे.”

अमेरिकेच्या लष्करी ताकदीचा पुनरुच्चार करताना राष्ट्राध्यक्ष ट्रम्प म्हणाले की, अमेरिकन लष्कराने इराणच्या सात छोट्या नौकांना लक्ष्य केले आहे. ते पुढे म्हणाले की, “आमच्याकडे आजवरची सर्वात प्रगत शस्त्रे आणि दारूगोळा उपलब्ध आहे. जगभरात आमचे लष्करी तळ असून ते सर्व साधनसामग्रीने सज्ज आहेत. आम्ही या सर्व गोष्टींचा वापर करू शकतो आणि गरज पडल्यास नक्कीच करू.”