महिलांच्या आरोग्याशी संबंधित काही समस्या अशा असतात, ज्याबद्दल अनेकदा उघडपणे बोलले जात नाही. त्यापैकीच एक म्हणजे व्हाइट डिस्चार्ज किंवा पांढरे पाणी जाणे. काही प्रमाणात हा शरीरातील नैसर्गिक बदलांचा भाग असला तरी, त्यात अचानक वाढ होणे किंवा इतर त्रासदायक लक्षणे दिसू लागणे हे आरोग्याविषयीचा इशारा ठरू शकते.
मासिक पाळीच्या आधी, नंतर किंवा ओव्हुलेशनच्या काळात थोड्या प्रमाणात पांढरा स्त्राव होणे सामान्य मानले जाते. मात्र, रोजच जाडसर स्त्राव होणे, त्याला तीव्र किंवा घाण वास येणे किंवा त्यासोबत शरीरात इतर त्रास जाणवणे याकडे गांभीर्याने पाहणे गरजेचे आहे.
व्हाइट डिस्चार्जची लक्षणे:
– सतत किंवा वारंवार पाठदुखी होणे
– पायात गोळे येणे
– दिवसभर थकवा जाणवणे
– अशक्तपणा किंवा ऊर्जा कमी होणे
– काही प्रकरणांमध्ये वजन घटणे
कोणता व्हाइट डिस्चार्ज चिंतेचा विषय ठरू शकतो?
– दह्यासारखा जाडसर स्त्राव
– तीव्र किंवा अस्वच्छ वास येणे
– दीर्घकाळ सतत स्त्राव होणे
– खाज, जळजळ किंवा अस्वस्थता जाणवणे
असामान्य स्थिती:
मासिक पाळीच्या काही दिवस आधी किंवा नंतर तसेच ओव्हुलेशनच्या काळात होणारा स्त्राव सामान्य असू शकतो. मात्र, याव्यतिरिक्त दीर्घकाळ नियमितपणे स्त्राव होत असल्यास त्यामागील कारण शोधणे आवश्यक आहे.
कारणे कोणती?
आयुर्वेदानुसार पचनक्रिया बिघडणे आणि शरीरातील कफदोष वाढणे ही काही कारणे असू शकतात. तसेच संसर्ग, हार्मोनल बदल किंवा इतर आरोग्यविषयक कारणांमुळेही हा त्रास उद्भवू शकतो.
कोणत्या गोष्टी टाळाव्यात?
आरोग्यतज्ज्ञांच्या सल्ल्यानुसार आहारात संतुलन ठेवणे महत्त्वाचे आहे. अतिथंड पदार्थ, अतिगोड पदार्थ, तेलकट अन्न आणि शिळे अन्न यांचे प्रमाण कमी ठेवणे फायदेशीर ठरू शकते.
व्हाइट डिस्चार्ज ही प्रत्येक वेळी गंभीर समस्या नसते. मात्र, त्यासोबत इतर त्रास जाणवत असतील किंवा समस्या दीर्घकाळ टिकून राहत असेल, तर वेळ न दवडता डॉक्टरांचा सल्ला घेणे हा सर्वात सुरक्षित पर्याय आहे.
(अस्वीकरण: हा लेख सामान्य माहितीच्या उद्देशाने तयार करण्यात आला आहे. My Mahanagar Live या माहितीची पुष्टी करत नाही. कोणतीही आरोग्यविषयक समस्या असल्यास डॉक्टर किंवा तज्ज्ञांचा सल्ला घ्यावा.)
Comments are closed.