सिंहगडावरील तानाजी कड्यावरुन युवक दरीत कोसळला; हैदराबादहून मित्रांसमवेत पुण्यात आलेला ग्रुप

पुणे : सध्या पावसाळी (Rain) पर्यटनासाठी मित्र कंपनी, कुटुंबीय आणि वेगवेगळे ग्रुप्स निसर्सरम्य ठिकाणी जात आहेत. पुणे जिल्हा हाही पर्यटनासाठी प्रसिद्ध असून सिंहगड किल्ला आणि परिसरात दरवर्षी देशाच्या कानाकोपऱ्यातून पर्यटक येतात. त्यातच, पुण्यातील सिंहगड किल्ल्याच्या तानाजी कड्यावरून खोल दरीत कोसळून एक पर्यटक बेपत्ता झाल्याची घटना उघडकीस आली आहे. सिंहगड (Pune) किल्ल्याच्या तानाजी कडा येथे हवा पॉइंटजवळील खोल दरीत पाय घसरून पडल्याने पर्यटक बेपत्ता झाला असून घटनास्थळी प्रशासन व पोलीस (Police) कर्मचारी पोहोचले आहेत. गौतम गायकवाड (वय 24) असे बेपत्ता तरुणाचे नाव असून त्याच्यासाठी शोधमोहिम राबवली जात आहे. गौतम हा हैदराबादवरुन मित्रांसमवेत पर्यटनास आला होता.

हैदराबाद येथून गौतमसह 5 जणांचा ग्रुप पुणे येथे फिरण्यासाठी आला होता.  गुरुवारी दुपारी 4.30 वाजता ते सिंहगडावर आले असता, या वेळेस सायंकाळच्या सुमारास तानाजी कड्याजवळ येऊन ते पर्यटनाचा आनंद घेत होते. त्यावेळी, गौतमने लघवीला जाऊन येतो असे मित्रांना सांगितले. मात्र, बऱ्याच वेळानंतरही तो परत आला नाही. त्यामुळे मित्रांनी गौतमचा शोध घेतला असता तो कुठेही आढळून आला नाही. जवळच हवा पॉइंटशेजारी त्याची चप्पल सापडली, मात्र तो दिसला नाही. सिंहगड भागात मुसळधार पाऊस असून, वाऱ्याचा वेगही जास्त आहे. वाऱ्याचा व जमिनीचा अंदाज न आल्याने गौतम खोल दरीत कोसळला असावा असा अंदाज त्याच्या मित्रांकडून लावला गेल्याने गौतमचा शोध घेतला जात आहे.

घटनास्थळी आपत्ती व्यवस्थापन आणि  ग्रामीण पोलीस कर्मचारी, व स्थानिक गिर्यारोहक कार्यकर्ते या तरुणाचा रात्री उशिरापर्यंत शोध घेत होते. जवळपास एक हजार फुटापर्यंत खोल दरीत उतरून आपत्ती व्यवस्थापन पथकाने शोध घेण्याचा प्रयत्न केला. खोल दरीत जाऊन मुसळधार पाऊस, वाऱ्यात बेपत्ता गौतमचा शोध घेतला. मात्र रात्रीच्या अंधारात तो आढळून न आल्याने रात्री 11 वाजता शोधकार्य थांबवले. त्यानंतर, आज सकाळी 6 वाजता पुन्हा शोधकार्य सुरू करण्यात आले आहे.

हेही वाचा

मोठी बातमी : बीडमध्ये सरकारी वकिलाने कोर्टातच जीवन संपवलं, आता कुटुंबाच्या मागणीने मोठा ट्विस्ट

आणखी वाचा