मुख्यमंत्र्यांच्या नागपुरातच भाजपची कोंडी; 151 जागांसाठी 300 जणांना अर्जासह तयारीचे निर्देश

नागपूर : राज्यातील महापालिका निवडणुकांसाठीची (Election) रणधुमाळी अंतिम टप्प्यात आली असून आज आणि उद्या उमेदवारी अर्ज भरण्यासाठी कार्यकर्त्यांची मोठी गर्दी होत आहे. तर, पक्षाकडून उमेदवारी मिळवण्यासाठी इच्छुकांची गर्दी होत असल्याने राजकीय पक्षांनी उमेदवारांच्या नावांची यादी जाहीर करण्याऐवजी थेट एबी फॉर्म देत किंवा उमेदवारांना अर्जाची तयारी करण्याचा निरोप देत रणनीती आखल्याचं दिसून येत आहे. मुख्यमंत्र्‍यांचं होम ग्राऊंड असलेल्या नागपूर (Nagpur) महापालिकेतही भाजपकडून (BJP) इच्छुकांची मोठी गर्दी असल्याने भाजपने 151 जागांसाठी तब्बल 300 उमेदवारांना तयार राहण्याचे निर्देश दिले आहेत. विशेष म्हणजे मुख्यमंत्री देवेंद्र फडणवीस यांच्या मतदारसंघातील प्रभागातच गोंधळसदृश्य परिस्थिती असल्याचं दिसून येतं आहे.

नागपुरात महापालिकेच्या 151 जागा असताना भाजपने सध्या तरी सुमारे 300 कार्यकर्त्यांना उमेदवारी अर्ज आणि कागदपत्रे तयार ठेवण्यास सांगितल्याची माहिती आहे. नागपूर भाजपकडून अजूनही अनेक जागांवर एकापेक्षा जास्त सक्षम दावेदार असल्यामुळे अंतिम निर्णय होऊ शकलेला नाही. भाजपच्या उमेदवारांची यादी उद्याच जाहीर होणार असल्याची माहिती भाजप शहर अध्यक्ष दयाशंकर तिवारी यांनी दिली. नागपूर महापालिकेमध्ये 151 जागा असून युतीतील मित्रपक्ष असलेल्या शिवसेनेसाठी सुमारे 8 ते 10 जागा सोडल्यानंतर भाजप किमान 140 जागांवर निवडणूक लढवण्याची शक्यता आहे. त्यामुळे, नागपुरात शिंदेंच्या शिवसेनेला फक्त 8 ते 10 जागांवरच समाधान मानावे लागणार आहे.

भाजपमध्ये अजूनही अनेक जागांवर एकापेक्षा अधिक सक्षम दावेदार असल्यामुळे पक्षश्रेष्ठींनी अंतिम निर्णय घेतलेला नाही. सुमारे 300 कार्यकर्त्यांना त्यांचे उमेदवारी अर्ज आणि त्या संदर्भातील कागदपत्रे तयार ठेवण्यास सांगितल्याचे दयाशंकर तिवारी म्हणाले. उद्या या 300 पैकी कुणाला उमेदवारी मिळाली आहे हे स्पष्ट होऊ शकेल अशी माहिती तिवारी यांनी दिली.

मविआ एकत्र, अजित पवारांची राष्ट्रवादी वंचितसोबत

नागपूरमध्येही महाविकास आघाडीचे तिन्ही पक्ष एकत्र लढण्यावर जवळपास एकमत झाल्याची माहिती आहे. सूत्रांच्या माहितीनुसार, काँग्रेस 129, राष्ट्रवादी काँग्रेस (शरद पवार ) 12 आणि ठाकरेंच्या शिवसेनेला 10 जागा, या सूत्रावर तिन्ही पक्षाच्या स्थानिक नेत्यांनी होकार दर्शवला असल्याची माहिती आहे. तर, नागपूरमध्ये भाजपकडून राष्ट्रवादी काँग्रेस पक्षाला युतीसाठी विचारलं जात नसल्याने राष्ट्रवादी काँग्रेसने वंचितसोबत चर्चा सुरु केली आहे. राष्ट्रवादी काँग्रेस पक्ष व वंचित यांची बोलणी साकारातमक टप्प्यावर असल्याचे समजते.

महापालिका निवडणूक कार्यक्रम

नामनिर्देशनपत्र स्वीकारणे: 23 डिसेंबर 2025 ते 30 डिसेंबर 2025

नामनिर्देशनपत्रांची छाननी: 31 डिसेंबर 2025

उमेदवारी माघारीची अंतिम मुदत : 02 जानेवारी 2026

निवडणूक चिन्ह वाटप : 03 जानेवारी 2026

अंतिम उमेदवारांची यादी- 03 जानेवारी 2026

मतदानाचा दिनांक : 15 जानेवारी 2026

मतमोजणीचा दिनांक : 16 जानेवारी 2026

हेही वाचा

मुंबई महानगरपालिकेसाठी ठाकरेंच्या शिवसेनेच्या उमेदवारांची यादी; सुतार, वाडकर, फणसे, सावंत…कोणाकोणाला संधी?

आणखी वाचा