काळजी करण्याचं कारण नाही! देशात LPG आणि कच्च्या तेलाची काय स्थिती? सरकारनं दिली महत्वाची माहिती

एलपीजी बातम्या: इराण इस्त्रायल अमेरिका युद्धाचा सर्वच देशावर परिणाम झाला आहे. भारतात देखील काही भागात गॅसची टंचाई निर्माण झाल्याच चित्र पाहायला मिळालं होतं. दरम्यान, एलपीजी आणि कच्च्या तेलाच्या संदर्भात सरकारनं आता महत्वाची माहिती दिली आहे. देशात एलपीजी आणि कच्च्या तेलाची कोणतीही कमतरता नाही, असे सरकारने म्हटले आहे. देशात पुरवठा सामान्य आहे. वितरण यंत्रणा सुरळीत असल्याचं सरकारकडून सांगण्यात आलं आहे.

देशात एलपीजी आणि कच्च्या तेलाची कमतरता नसल्याचे सांगून सरकारने परिस्थिती स्पष्ट केली आहे. पेट्रोलियम मंत्रालयाच्या सहसचिव सुजाता शर्मा यांनी सांगितले की, देशात कच्च्या तेलाचा पुरेसा साठा असून देशांतर्गत ग्राहकांना प्राधान्याने एलपीजीचा पुरवठा केला जात आहे.

एलपीजी पुरवठा आणि बुकिंगची स्थिती

सरकारच्या म्हणण्यानुसार, देशभरात एलपीजी वितरण पूर्णपणे कार्यरत आहे. कोणत्याही वितरक स्तरावर तुटवड्याचे वृत्त नाही. अलीकडेच, एकाच दिवसात अंदाजे 50 लाख सिलिंडरसाठी बुकिंगची नोंद झाली, तर वितरणाचा दर अंदाजे 93 टक्के होते. आता 98 टक्के बुकिंग ऑनलाइन होत असल्याने प्रक्रिया अधिक जलद आणि पारदर्शक झाली आहे. उन्हाळ्याच्या हंगामामुळे बुकिंगमध्ये किंचित घट झाली असून, हा आकडा आता अंदाजे 45 ते 46 लाख सिलिंडरवर पोहोचला आहे.

मार्च 2026 पासून अंदाजे 4.68 लाख नवीन पीएनजीची जोडणी

मार्च 2026 पासून, अंदाजे 4.68 लाख नवीन पीएनजी (पाईपद्वारे नैसर्गिक वायू) जोडण्या देण्यात आल्या आहेत. याशिवाय, नियमांचे उल्लंघन केल्याबद्दल 255 एलपीजी वितरकांना दंड ठोठावण्यात आला आहे, तर 55 जणांना निलंबित करण्यात आले आहे. 23 मार्चपासून 1.65 दशलक्षाहून अधिक लहान (5 किलो) सिलिंडरची विक्रीही झाली आहे. दरम्यान, देशातील सर्व बंदरे सामान्यपणे कार्यरत आहेत आणि कुठेही गर्दी नाही. याचा पुरवठा साखळीवर कोणताही परिणाम झालेला नाही.

आंतरराष्ट्रीय उड्डाणे आणि प्रवाशांची स्थिती

परराष्ट्र मंत्रालयाचे अतिरिक्त सचिव असीम आर. महाजन यांनी माहिती दिली की, 28 फेब्रुवारीपासून अंदाजे 10.38 लाख प्रवासी भारतात परतले आहेत. त्यांनी पुढे सांगितले की, संयुक्त अरब अमिराती (UAE) मधून भारतासाठी अंदाजे 100 विमानांची उड्डाणे अपेक्षित आहेत. सौदी अरेबिया, ओमान आणि कुवेत येथूनही नियमित विमानसेवा सुरू आहे. कतारची हवाई हद्द अंशतः खुली असून, तेथून मर्यादित विमानसेवा सुरू आहेत. बहरीनहून मर्यादित विमानसेवा लवकरच पुन्हा सुरू करण्याचे नियोजन आहे.

परिस्थिती नियंत्रणात

सरकारचा दावा आहे की एलपीजी, कच्चे तेल, बंदरांचे कामकाज आणि आंतरराष्ट्रीय विमानसेवा या संदर्भातील परिस्थिती पूर्णपणे नियंत्रणात असून, जनतेला कोणत्याही अडचणींचा सामना करावा लागणार नाही.

आणखी वाचा