IPL 2026: षटकारांचा पाऊस पाडा आणि बक्षीस जिंका! कर्णधार श्रेयस अय्यरचा प्रियांश-कूपरला खास चॅलेंज

पंजाब किंग्जचा (PBKS) कर्णधार श्रेयस अय्यरने रविवारी, आयपीएल 2026 मध्ये लखनऊ सुपर जायंट्सवर (LSG) मिळवलेल्या विजयानंतर सांगितले की, प्रियांश आर्या आणि कूपर कॉनली यांच्यातील दुसऱ्या गड्यासाठीची भागीदारी अत्यंत शानदार होती. मुल्लानपूर येथे प्रियांश (37 चेंडूंत 93 धावा ज्यात चार चौकार आणि 9 षटकारांचा समावेश) आणि कॉनली (46 चेंडूंत 87 धावा ज्यात आठ चौकार आणि 7 षटकारांचा समावेश होता) यांनी खेळलेल्या स्फोटक खेळीच्या जोरावर आणि या दोघांमध्ये दुसऱ्या गड्यासाठी झालेल्या 182 धावांच्या विशाल भागीदारीमुळे पंजाबने 54 धावांच्या विजयासह आपली विजयी मालिका कायम राखली.

सामन्यानंतर बोलताना अय्यर म्हणाला, “या दोघांमधील भागीदारी अप्रतिम होती. त्यांनी मारलेले काही फटके तर थक्क करणारे होते. वेगवान गोलंदाजांविरुद्ध बॅकफूटवर जाऊन सरळ फटके मारणे… मधल्या षटकांमध्ये या दोघांनी दाखवलेला संयम जबरदस्त होता.” त्याने पुढे सांगितले, “मी कूपर आणि आर्या यांच्याशी बोलत होतो आणि त्यांना म्हणालो, ‘या हंगामात सर्वाधिक षटकार कोण मारतो ते पाहूया.’ याचे बक्षीस म्हणून माझी बॅट दिली जाईल. हे थोडे विचित्र वाटू शकते, पण आशा आहे की यामुळे आम्हा सर्वांना आनंद मिळेल.”

अय्यर म्हणाला, “माझा असा विश्वास आहे की जेव्हा तुम्ही खेळाडूंना मुक्तपणे खेळण्याची मुभा देता, तेव्हा ते आपली सर्वोत्तम कामगिरी करतात. हाच आमचा मुख्य मंत्र आहे. त्यांनी आपली खेळी कशी घडवावी याबद्दल मी त्यांना आदेश देत नाही. त्यांच्या स्वतःच्या ठरलेल्या पद्धती आहेत. प्रशिक्षक रिकी पॉन्टिंग सामन्यापूर्वीच खेळाडूंचा आत्मविश्वास वाढवतात आणि मी देखील माझ्या बाजूने काही प्रोत्साहनाचे शब्द बोलतो. त्यानंतर, मुले मैदानात उतरतात आणि आपली जादू दाखवतात.”

तो पुढे म्हणाला “आमचे बहुतेक गोलंदाज आंतरराष्ट्रीय दर्जाचे आहेत आणि त्यांच्याकडे अनुभवाची मोठी शिदोरी आहे. विशिष्ट फलंदाजांसाठी आमच्याकडे आधीच आखलेल्या रणनीती तयार असतात; आम्हाला फक्त त्यांची योग्य अंमलबजावणी करायची असते.”

सहापैकी पाच सामने जिंकून, 11 गुणांसह पंजाब किंग्ज गुणतालिकेत आपले अव्वल स्थान कायम राखण्यात यशस्वी ठरले आहे. हा लखनऊचा सलग तिसरा पराभव ठरला. पंजाब किंग्जने 7 गड्यांच्या मोबदल्यात 254 धावांचा विशाल धावफलक उभारला. प्रत्युत्तरात, एलएसजी संघाला त्यांच्या 20 षटकांत 5 गड्यांच्या मोबदल्यात केवळ 200 धावाच करता आल्या.