Gold Silver Rate – सोनेचांदीचे दर बनले रॉकेट; सोन्याचे भाव 10 हजाराने वाढले, चांदीने गाठला 3 लाखांचा टप्पा

अमेरिका, इस्रायल इराण युद्धामुळे सोनेचांदीच्या दरात सातत्याने चढउतार होत होते. दोन्ही देशात शस्त्रसंधी झाल्याने सोनेचांदीतील घसरण थांबली होती. मात्र, जागातिक अशांतता कायम असल्याने दरांमध्ये चढउतार होत होते. मात्र, बुधवारी सोनेचांदीच्या दरात तेजी आली आणि सोनेचांदीचे दर अचानक रॉकेट बनले. वायदे बाजाराला सुरुवात होताच सोने 10000 ने वाढले. तर चांदीने 17 हजाराची वाढ नोंदवत पुन्हा एकदा 3 लाखांचा टप्पा पार केला आहे.

सोने आणि चांदीच्या दरात बुधवारी मोठा बदल झाला आहे. मोदी सरकारच्या एका निर्णयामुळे या मौल्यवान धातूंच्या किमती गगनाला भिडल्या आहेत. बुधवारी, मल्टी कमोडिटी एक्सचेंज (MCX) वर सोन्याचा दर प्रति १० ग्रॅम ११,००० रुपयांपेक्षा जास्त वाढला, तर चांदीचा भावही बाजार उघडताच ३ लाख रुपयांच्या वर पोहोचला.

सोन्या-चांदीबाबत मोदी सरकारने घेतलेल्या एका निर्णयामुळे ही प्रचंड दरवाढ दिसून आली आहे. सरकारने सोने, चांदी आणि इतर मौल्यवान धातूंवरील आयात शुल्क किंवा सीमा शुल्कात लक्षणीय वाढ केली आहे. सोन्याच्या आयात शुल्कात वाढ जाहीर करून ते सध्याच्या ६% दरावरून १५% पर्यंत वाढवण्यात आले आहे.

सोन्यावरील आयात शुल्क वाढवण्याच्या सरकारच्या निर्णयाचा कमोडिटी बाजारावर थेट परिणाम झाला आहे. MCX वरील सोन्याच्या दरांबद्दल बोलायचे झाल्यास, ५ जून रोजी मुदत संपणाऱ्या १० ग्रॅम २४-कॅरेट सोन्याचा दर मंगळवारी १,५३,४४२ रुपयांवर बंद झाला. बुधवारी फ्युचर्स ट्रेडिंग सुरू होताच या मौल्यवान पिवळ्या धातूचा भाव अचानक प्रति १० ग्रॅम १,६४,४९७ रुपयांपर्यंत वाढला. ही अंदाजे ७% ची वाढ असून, त्यानुसार गणना केल्यास १० ग्रॅम सोने ११,०५५ रुपयांनी महाग झाले.

चांदीचे भावही सोन्याच्या बरोबरीने वाढत आहेत. एमसीएक्सवर ३ जुलै रोजी मुदत संपणाऱ्या चांदीच्या भावाने पुन्हा एकदा ३ लाख रुपयांचा टप्पा ओलांडला आहे. आदल्या दिवशी चांदीचा भाव २,७९,०६२ रुपये प्रति किलोवर बंद झाला होता. बुधवारीही बाजाराच्या सुरुवातीलाच त्यात मोठी वाढ झाली आणि तो ३,०१,४२९ रुपये प्रति किलोवर पोहोचला. अशाप्रकारे, चांदीच्या भावात एकाच झटक्यात २२,३६७ रुपयांची वाढ झाली.