स्टार खेळाडू ख्रिस्तियन पुलिसिकच्या अनुपस्थितीतही यजमान अमेरिकेने आपली ताकद सिद्ध केली. अमेरिकेने ऑस्ट्रेलियाचा 2-0 गोल फरकाने पराभव करत फिफा वर्ल्ड कपच्या बाद फेरीत धडक मारली. अमेरिकेचा हा सलग दुसरा विजय ठरला. त्यानंतर पराग्वेने तुर्कीएचा 1-0 असा पराभव केल्याने अमेरिकेने गट ‘डी’मधील अव्वल स्थानही निश्चित केले.
सामन्याच्या 11व्या मिनिटाला बालोगुनने डाव्या बाजूने केलेल्या वेगवान चढाईनंतर दिलेला पास रोखण्याच्या प्रयत्नात ऑस्ट्रेलियाचा बचावपटू कॅमेरॉन बर्गेस याच्याकडून आत्मघातकी गोल झाला आणि अमेरिकेला 1-0 अशी आघाडी मिळाली. पहिल्या सत्राच्या अखेरीस, 43 व्या मिनिटाला 21 वर्षीय ऍलेक्स फ्रीमनने मिळालेल्या संधीचे सोने केले. सर्जिनो डेस्टच्या वळवलेल्या फटक्यावर त्याने अचूक हेडर मारत कारकिर्दीतील पहिला विश्वचषक गोल नोंदवला. व्हिडीओ पुनरावलोकनानंतर हा गोल वैध ठरवण्यात आला आणि अमेरिकेची आघाडी 2-0 झाली.
दुसऱ्या सत्रात अमेरिकेला गोल करता आला नाही, तरी पहिल्या 45 मिनिटांत दाखवलेले वर्चस्व ऑस्ट्रेलियाला पूर्णपणे निष्प्रभ ठरवणारे होते. गटविजेता ठरलेल्या अमेरिकेचा आता 1 जुलै रोजी सांताक्लारा येथे बाद फेरीचा सामना होणार आहे. स्पर्धेच्या सुरुवातीलाच अमेरिकेने दाखवलेला दमदार खेळ पाहता विजेतेपदाच्या शर्यतीतील त्यांचा दावा अधिक मजबूत झाला आहे.
Comments are closed.