फ्रेंच सरकारच्या कामगार प्राधिकरणाने इन्फोसिस या प्रमुख आयटी कंपनीला १,७५,००० युरो (अंदाजे २ कोटी रुपये) दंड ठोठावला आहे. कर्मचाऱ्यांच्या कामाच्या तासांची नोंद ठेवणाऱ्या प्रणालीमुळे (टाईम ट्रॅकिंग) कंपनीवर ही कारवाई करण्यात आली आहे.
एका फ्रेंच प्राधिकरणाने हिंदुस्थानी कंपनी इन्फोसिसला तिच्या कर्मचाऱ्यांच्या कामाच्या वेळेचा मागोवा घेण्याच्या पद्धतीबद्दल दंड ठोठावला आहे. फ्रेंच प्राधिकरणाचा दावा आहे की, कंपनीने कर्मचाऱ्यांच्या कामाच्या वेळेचा मागोवा घेण्याच्या पद्धतीत स्थानिक कायद्याचे उल्लंघन केले आहे.
युरोपमध्ये कर्मचाऱ्यांच्या हिताचे रक्षण करणारे कठोर आणि कडक कायदे आहेत. तिथे कोणतीही कंपनी आपल्या कर्मचाऱ्यांना अतिरिक्त मोबदला दिल्याशिवाय ठरलेल्या तासांपेक्षा जास्त काम करायला लावू शकत नाही. एखादा कर्मचारी ठरलेल्या वेळेपेक्षा जास्त काम करण्यास नकार देत असेल आणि कंपनीने दबाव आणला तर युरोपमध्ये कंपनीला दंड आकारला जातो.
फ्रेंच अधिकाऱ्यांच्या मते, इन्फोसिसची वेळ नोंदवणारी प्रणाली (टाइम ट्रॅकिंग सिस्टीम) स्थानिक नियमांचे पूर्णपणे पालन करत नव्हती. तथापि, कंपनीचे म्हणणे आहे की या दंडाचा त्यांच्या व्यवसायावर किंवा आर्थिक परिस्थितीवर कोणताही महत्त्वपूर्ण परिणाम होणार नाही.
कंपनीच्या म्हणण्यानुसार, हा मुद्दा कर्मचाऱ्यांच्या कामाचे तास नोंदवण्यासाठी वापरल्या जाणाऱ्या प्रणालीशी संबंधित आहे. अधिकाऱ्यांनी तपास केला असता, त्यांना आढळले की ही प्रणाली फ्रेंच कामगार कायद्याच्या काही विशिष्ट आवश्यकता पूर्ण करत नव्हती. अहवालानुसार, फ्रेंच प्राधिकरणाने म्हटले आहे की इन्फोसिसच्या प्रणालीमध्ये विश्वसनीयता, नोंदींची पडताळणी आणि कर्मचाऱ्यांच्या कामाच्या तासांवर योग्य देखरेख ठेवण्याशी संबंधित त्रुटी होत्या.
इन्फोसिसने एका निवेदनात म्हटले आहे की ते या प्रकरणाचा आढावा घेत आहेत आणि पुढील कायदेशीर कारवाई करतील. कंपनीने म्हटले आहे की या दंडाचा त्यांच्या आर्थिक स्थितीवर, दैनंदिन कामकाजावर किंवा व्यवसायावर कोणताही महत्त्वपूर्ण परिणाम होणार नाही.
ही घटना अशा वेळी घडली आहे, जेव्हा इन्फोसिस भारतातही आपल्या कर्मचारी उपस्थितीच्या नियमांमुळे चर्चेत आहे. गेल्या काही महिन्यांत, कंपनीने अनेक कर्मचाऱ्यांना आठवड्यातून अधिक दिवस कार्यालयातून काम करणे अनिवार्य केले आहे. तथापि, फ्रान्समध्ये आकारण्यात आलेला दंड हा घरून काम करण्याशी किंवा कार्यालयात उपस्थित राहण्याशी संबंधित नसून, कर्मचाऱ्यांच्या कामाचे तास नोंदवण्यासाठी वापरल्या जाणाऱ्या प्रणालीशी संबंधित आहे.
फ्रान्समध्ये कर्मचाऱ्यांच्या कामाचे तास, ओव्हरटाईम आणि विश्रांतीच्या वेळेबाबत अत्यंत कठोर नियम आहेत. तेथील कंपन्यांना हे सिद्ध करणे बंधनकारक आहे की ते कर्मचाऱ्यांच्या कामाच्या तासांची अचूक नोंद करत आहेत. या नियमांचे पालन न केल्यास दंड आकारला जाऊ शकतो.
Comments are closed.