भारताविरुद्ध कसोटी मालिकेपूर्वी श्रीलंकेची डोकेदुखी वाढली! ‘हा’ खेळाडू बाहेर, यष्टीरक्षकासाठी या 2 खेळाडूंमध्ये चुरस

भारताविरुद्ध 15 ऑगस्टपासून सुरू होणाऱ्या दोन सामन्यांच्या कसोटी मालिकेपूर्वी श्रीलंकेच्या अडचणी वाढल्या आहेत. (2 Test match between IND vs SL) श्रीलंकेसमोर यष्टीरक्षकाचा मोठा प्रश्न निर्माण झाला आहे.

श्रीलंकेने अजून मालिकेसाठी संघाची घोषणा केलेली नाही, पण रिपोर्ट्सनुसार संघाचा अनुभवी यष्टीरक्षक-फलंदाज कुशल मेंडिस (Kushal Mendis) दुखापतीमुळे पहिल्या कसोटी सामन्यातून बाहेर होऊ शकतो. अशा परिस्थितीत भारता विरुद्धच्या कसोटी मालिकेपूर्वी श्रीलंका संघ मेंडिसच्या संभाव्य पर्यायाचा शोध घेत आहे.

निवडकर्त्यांनी यष्टीरक्षणासाठी दोन पर्याय शॉर्टलिस्ट केले आहेत, ज्यामध्ये एका अनुभवी आणि एका युवा खेळाडूचा समावेश आहे. श्रीलंकेचा नियमित यष्टीरक्षक-फलंदाज कुशल मेंडिसला लंका प्रीमियर लीग (LPL) 2026 दरम्यान उजव्या हॅमस्ट्रिंगची दुखापत झाली होती, ज्यामुळे त्याला स्पर्धेतून बाहेर व्हावे लागले होते. रिपोर्ट्सनुसार, हॅमस्ट्रिंगच्या दुखापतीमुळे तो भारताविरुद्धच्या पहिल्या कसोटीत खेळू शकणार नाही. त्यामुळे अशा स्थितीत त्याची जागा घेण्यासाठी 33 वर्षीय निरोशन डिकवेला आणि 22 वर्षीय अंजला बंडारा यांच्यात चुरस आहे.

समोर आलेल्या माहितीनुसार, डिकवेला आणि बंडारा यांना तात्पुरत्या संघात समाविष्ट करण्यात आले आहे. मात्र, या दोघांपैकी एकाच खेळाडूला मुख्य संघात स्थान मिळू शकते.

यष्टीरक्षक-फलंदाज निरोशन डिकवेला गेल्या 3 वर्षांपासून श्रीलंका संघाबाहेर असला, तरी त्याच्याकडे कसोटीचा चांगला अनुभव आहे. डिकवेलाने शेवटचा कसोटी सामना 2023 मध्ये श्रीलंका संघासाठी खेळला होता. त्याच्याकडे 54 कसोटी सामन्यांचा अनुभव असून यष्टीरक्षणामध्ये तो संघासाठी एक विश्वासार्ह पर्याय ठरू शकतो. तरीही, फलंदाजीच्या बाबतीत त्याची कामगिरी फारशी विशेष राहिलेली नाही. डिकवेलाने कसोटी क्रिकेटमध्ये आतापर्यंत एकही शतक झळकावलेले नाही.

दुसऱ्या बाजूला, 22 वर्षीय अनकॅप्ड (आंतरराष्ट्रीय सामना न खेळलेला) यष्टीरक्षक-फलंदाज अंजला बंडाराने देशांतर्गत क्रिकेटमध्ये शानदार कामगिरी केली असून तो संघासाठी एक उत्तम पर्याय ठरू शकतो. नुकताच त्याने भारता विरुद्धच्या सराव सामन्यात श्रीलंका क्रिकेट प्लेइंग इलेव्हन (Sri Lanka Cricket XI) कडून खेळताना 13 आणि 35 धावा केल्या होत्या.

याआधी ‘इंडिया ए’ विरुद्धच्या दोन अनधिकृत कसोटी सामन्यांच्या मालिकेतही बंडारा सहभागी झाला होता, जिथे त्याने 42, 17 आणि 15 धावांच्या खेळी केल्या होत्या.

तसेच, प्रथम श्रेणी (फर्स्ट क्लास) क्रिकेटमध्येही त्याची कामगिरी उत्कृष्ट राहिली असून त्याने 31 सामन्यांमध्ये 65.85 च्या सरासरीने 2239 धावा केल्या आहेत. या दरम्यान त्याच्या बॅटमधून 7 शतके आणि ७ अर्धशतके देखील झळकली आहेत.

कुशल मेंडिस हा श्रीलंकेचा तिन्ही फॉरमॅटमधील प्रमुख यष्टीरक्षक-फलंदाज आहे आणि तो उत्कृष्ट फॉर्ममध्येही होता. LPL 2026 मधून बाहेर पडण्यापूर्वी त्याने 53 चेंडूत 79 धावांची शानदार खेळी केली होती. याशिवाय, पाकिस्तान सुपर लीग (PSL) मध्ये त्याने 11 डावांमध्ये 168.69 च्या स्ट्राइक रेटने 550 धावा केल्या आहेत. याच वर्षी श्रीलंकेसाठी टी-20 च्या 14 डावांमध्ये त्याने 408 धावा केल्या आहेत, तर वनडे सामन्यांच्या (ODI) 4 डावांमध्ये 70.33 च्या सरासरीने 211 धावा केल्या आहेत.

याप्रकारे, मेंडिसचे मालिकेतून बाहेर होणे हे श्रीलंका संघासाठी एक मोठा धक्का मानला जात आहे. भारत आणि श्रीलंका यांच्यातील कसोटी मालिकेचा पहिला सामना 15 ऑगस्टपासून गॅले (Galle) येथे खेळवला जाणार आहे. आता सर्वात मोठा प्रश्न हा आहे की, श्रीलंका संघ मेंडिसच्या जागी अनुभवी डिकवेलावर विश्वास दाखवतो की अनकॅप्ड खेळाडू अंजला बंडाराला संधी देतो.