ऑस्ट्रेलिया विरुद्ध बांगलादेश यांच्यातील कसोटी मालिकेला सुरुवात झाली असून, पहिल्याच दिवशी मिचेल स्टार्कने एक महत्त्वपूर्ण टप्पा गाठला. ऑस्ट्रेलियाचा संघ पहिल्या डावात अवघ्या 198 धावांत सर्वबाद झाला. बांगलादेशने आपला डाव सुरू केला तेव्हा मिचेल स्टार्कने आपल्या संघाला पहिले यश मिळवून दिले. या विकेटसह, स्टार्क कसोटी क्रिकेटच्या इतिहासात सर्वाधिक बळी घेणारा डावखुरा गोलंदाज ठरला.
विशेष म्हणजे, स्टार्कने हा ऐतिहासिक विक्रम आंतरराष्ट्रीय डाव्या हाताच्या व्यक्तींचा दिवस (International Left-Handers Day) साजरा होत असतानाच नोंदवला.
बांगलादेशविरुद्धच्या पहिल्या कसोटीत, ऑस्ट्रेलियाचा कर्णधार पॅट कमिन्सने नाणेफेक जिंकून प्रथम फलंदाजी करण्याचा निर्णय घेतला. मात्र, ऑस्ट्रेलियाचा डाव 198 धावांवर आटोपला. स्टीव्ह स्मिथने अर्धशतक झळकावून डाव सावरण्याचा प्रयत्न केला, परंतु इतर फलंदाजांना विशेष योगदान देता आले नाही.
परिणामी, बांगलादेशविरुद्धच्या कसोटी सामन्यात ऑस्ट्रेलियाचा संघ 200 धावांच्या आत सर्वबाद होण्याची ही पहिलीच वेळ ठरली.
ऑस्ट्रेलियाच्या डावानंतर बांगलादेशचा संघ फलंदाजीसाठी मैदानात उतरला. सलामीवीर शदमान इस्लाम आणि तन्झिद हसन तमीम यांनी संघाला भक्कम सुरुवात करून देण्याचा प्रयत्न केला. मात्र, डावाच्या नवव्या षटकात मिचेल स्टार्कने दुसऱ्याच चेंडूवर शदमान इस्लामला बाद केले.
नॅथन लायनने त्याचा झेल घेतला. शदमानने 30 चेंडूंत 20 धावा केल्या, ज्यात दोन चौकारांचा समावेश होता. या विकेटसह स्टार्कने 434 कसोटी बळींचा टप्पा गाठला.
या विकेटसह मिचेल स्टार्कने श्रीलंकेचा दिग्गज डावखुरा फिरकी गोलंदाज रंगना हेराथचा विक्रम मागे टाकला. हेराथच्या नावावर 433 कसोटी बळी होते, तर स्टार्कच्या नावावर आता 434 बळी झाले आहेत.
डावखुऱ्या वेगवान गोलंदाजांचा विचार करता, वसीम अक्रमने 414 बळी घेतले आहेत. विशेष म्हणजे, स्टार्कने हा टप्पा 13 ऑगस्ट रोजी म्हणजेच आंतरराष्ट्रीय डाव्या हाताच्या व्यक्तींच्या दिवशी गाठला.
कसोटी क्रिकेटमध्ये सर्वाधिक बळी घेणाऱ्यांच्या यादीत स्टार्कने कपिल देव यांच्या 434 बळींच्या विक्रमाशी बरोबरी केली आहे. आणखी एक बळी घेताच स्टार्क कपिल देव यांना मागे टाकेल.
Comments are closed.