भारतासोबत मालिका खेळण्यासाठी पाकिस्तान उत्सुक, आयसीसी लवकरच घेणार निर्णय

भारत आणि पाकिस्तान दरम्यान गेल्या अनेक वर्षांपासून कोणतीही मालिका खेळली गेलेली नाही. आता या दोघांमध्ये फक्त आयसीसी (ICC) आणि एसीसी (ACC) स्पर्धांमध्येच आमनेसामने सामना होतो. परिस्थिती अशी आहे की दोन्ही संघ एकमेकांच्या देशातही क्रिकेट खेळायला जात नाहीत. भारतावर याचा काहीही परिणाम झालेला नाही, पण पाकिस्तान त्रस्त आहे. पाकिस्तान भारतासोबत मालिका खेळण्यासाठी खूप उत्सुक दिसत आहे. कदाचित त्याची ही इच्छा पूर्ण होऊ शकते. याच महिन्यात आयसीसीचा एक सेमिनार होणार आहे, त्यात यावर चर्चा होऊ शकते.

​आयसीसीचा हा सेमिनार 22 आणि 23 सप्टेंबरला दुबईत होणार आहे. यापूर्वी भारत आणि पाकिस्तान दरम्यानच्या मालिकेबाबत पुन्हा एकदा चर्चा सुरू झाली आहे. खरं तर पाकिस्तान क्रिकेट बोर्डाला (PCB) असं वाटतंय की तीन किंवा चार देशांची एक स्पर्धा आयोजित केली जावी, ज्यामध्ये भारत आणि पाकिस्तानला सामील केलं जावं. या मालिकेचं ठिकाण (वेन्यू) सुद्धा न्यूट्रल (तटस्थ) ठेवण्याचा प्रस्ताव आहे. या मालिकेच्या शक्यता चाचपडून पाहिल्या जात आहेत. या गोष्टीचा खुलासा ‘एआरवाय न्यूज’च्या (ARY News) एका अहवाद्वारे झाला आहे. आता जेव्हा आयसीसीचा सेमिनार होईल, तेव्हा त्यात ‘फ्युचर टूर प्रोग्राम’वर (FTP) सुद्धा बोलणं होऊ शकतं. पीसीबीकडून या संदर्भात चर्चा केली जाण्याची शक्यता आहे. अर्थातच, यामध्ये आयसीसी, भारत आणि पाकिस्तान व्यतिरिक्त इतर देशांचे प्रतिनिधीही सहभागी असतील.

​विशेष बाब म्हणजे भारत आणि पाकिस्तान दरम्यान शेवटची द्विपक्षीय मालिका 2013 मध्ये खेळली गेली होती. तेव्हापासून आतापर्यंत फक्त आयसीसी आणि एसीसीच्या सामन्यांमध्येच यांच्यात लढत होते. तथापि, ही मालिका टी-२० स्वरूपात होईल की एकदिवसीय (ODI) स्वरूपात खेळवली जाईल हे अजून ठरलेले नाही. भारत आणि पाकिस्तान व्यतिरिक्त या स्पर्धेत आणखी एक किंवा दोन संघ सहभागी झाले, तर ही एक बहुराष्ट्रीय (मल्टीनेशन) स्पर्धा बनेल. पण फक्त आयसीसीच्या संमतीने काम होणार नाही. पाकिस्तान तर तसाही तयारच आहे, परंतु बीसीसीआयला (BCCI) या मालिकेसाठी भारत सरकारची परवानगी घ्यावी लागेल.

​आतापर्यंत जी माहिती समोर आली आहे, त्यानुसार ही प्रक्रिया पुढे गेल्यास यजमानपदासाठी यूएई (UAE), इंग्लंड किंवा ऑस्ट्रेलियाची निवड केली जाऊ शकते, जे दोन्ही संघांसाठी न्यूट्रल वेन्यू असतील. भारत आणि पाकिस्तान दरम्यान कोणताही सामना असो, तो फायद्याचाच सौदा असतो; अशा वेळी कोणताही देश ही मालिका आपल्याकडे आयोजित करण्याचा प्रस्ताव हातचा जाऊ देणार नाही. आता 22 आणि 23 सप्टेंबरला होणाऱ्या सेमिनारमध्ये यावर चर्चा होते का, हे पाहणे महत्त्वाचे ठरेल. जर चर्चा झालीच, तर त्यातून काय निष्पन्न होतं हे समोर येईल.