अफगाणिस्तानविरुद्धच्या टी-20 मालिकेला सुरुवात होण्याआधीच टीम इंडियासाठी चिंतेची बातमी समोर आली आहे. दिल्लीतील अरुण जेटली क्रिकेट स्टेडियमवर सराव करताना यष्टिरक्षक-फलंदाज ईशान किशनला दुखापत झाली. त्यामुळे त्याला सरावातील फलंदाजी अर्धवट सोडावी लागली.
वेगवान गोलंदाज नवदीप सैनीच्या उसळी घेणाऱ्या चेंडूपासून स्वतःचा बचाव करताना ईशानच्या पाठीला अचानक ताण आला. वेदना जाणवल्यानंतर फिजिओने तातडीने मैदानात येऊन त्याची तपासणी केली. ईशान काही वेळ गुडघ्यावर बसून राहिला. त्यानंतर कंबर धरत तो मैदानाबाहेर गेला. यानंतर तो पुन्हा फलंदाजीसाठी मैदानात आला नाही.
ईशानची दुखापत किती गंभीर आहे आणि तो अफगाणिस्तानविरुद्धच्या मालिकेत खेळू शकणार आहे की नाही, हे पुढील 24 तासांतील वैद्यकीय तपासणीनंतर स्पष्ट होणार आहे. सध्या ईशान शानदार फॉर्ममध्ये आहे. नुकत्याच झालेल्या दुलीप ट्रॉफीच्या अंतिम सामन्यात त्याने 270 आणि 80 धावांची दमदार खेळी केली होती.
ईशान किशनने दुलीप ट्रॉफीत ईस्ट झोनचे नेतृत्व केले होते. त्याच्या नेतृत्वाखाली ईस्ट झोनने 13 वर्षांनंतर दुलीप ट्रॉफीचे विजेतेपद पटकावले. अंतिम सामन्यात ईशानने 270 धावांची ऐतिहासिक खेळी करत ईस्ट झोनला पहिल्या डावात 708 धावांचा मोठा स्कोअर उभारून दिला. या शानदार कामगिरीसाठी त्याला सामनावीर पुरस्कारही मिळाला.
सराव सत्रातही ईशान चांगल्या लयीत दिसत होता. स्पिन गोलंदाजांविरुद्ध त्याने आक्रमक फलंदाजी करत अनेक चौकार आणि षटकार लगावले. त्यामुळे त्याच्या दुखापतीने भारतीय संघाची चिंता वाढली आहे.
भारत आणि अफगाणिस्तान यांच्यात तीन सामन्यांची टी-20 मालिका होणार आहे. या मालिकेतील तिन्ही सामने दिल्लीतील अरुण जेटली स्टेडियमवर 13, 15 आणि 17 सप्टेंबर रोजी खेळवले जाणार आहेत.
वेगवान गोलंदाज हर्षित राणा दुखापतीमुळे या मालिकेतून तसेच आशियाई क्रीडा स्पर्धेतून बाहेर झाला असून त्याच्या जागी यश ठाकूरचा संघात समावेश करण्यात आला आहे. दरम्यान, जसप्रीत बुमराह पूर्णपणे फिट असून खेळण्यासाठी सज्ज असल्याचे सांगितले जात आहे. आता ईशान किशनच्या दुखापतीचे गांभीर्य किती आहे आणि तो अफगाणिस्तानविरुद्धच्या मालिकेत खेळणार की नाही, याकडे सर्वांचे लक्ष लागले आहे.
Comments are closed.