अभिषेक शर्मा आणि बुमराहला बाहेर बसवा! जपानविरुद्धच्या सामन्याआधी आकाश चोप्रांनी कॅप्टन अय्यरला का दिला असा सल्ला?

भारतीय संघ (Indian cricket team) जपानविरुद्धच्या एकमेव टी-20 सामन्यासाठी आणि आशियाई क्रीडा स्पर्धा 2026 स्पर्धेसाठी रवाना झाला आहे. जपानमध्ये पोहोचल्यानंतर भारतीय खेळाडू सराव करत आहेत. 22 सप्टेंबरला भारत आणि जपान (India vs Japan) यांच्यात एकमेव टी-20 सामना खेळला जाणार आहे. या सामन्यासाठी आकाश चोप्रा (Aakash chopra) यांनी कर्णधार श्रेयस अय्यरला (Shreyas Iyer) काही सूचना दिल्या आहेत.

आकाश चोप्रांना भारतीय संघात दोन बदल हवे असून, जपानविरुद्धच्या सामन्यासाठी अभिषेक शर्मा (Abhishek Sharma & Jasprit Bumrah) आणि जसप्रीत बुमराह यांना प्लेइंग इलेव्हनमध्ये बाहेर ठेवावे, असे त्यांनी म्हटले आहे.

भारताचे माजी क्रिकेटपटू आकाश चोप्रांच्या (Aakash chopra) मते, जपानविरुद्धच्या सामन्यात अभिषेक शर्माला विश्रांती द्यावी आणि त्याच्या जागी वैभव सूर्यवंशीला (Vaibhav Suryavanshi) संधी द्यावी. याशिवाय जसप्रीत बुमराहलाही (Jasprit Bumrah) प्लेइंग इलेव्हनमधून बाहेर ठेवण्याचा सल्ला त्यांनी दिला आहे.

आपल्या यूट्यूब चॅनेलवर बोलताना आकाश चोप्रांनी सांगितले की, या सामन्यासाठी कर्णधार श्रेयस अय्यर अभिषेक शर्माला विश्रांती घेण्यास सांगू शकतो आणि सूर्यवंशीला खेळण्याची संधी देऊ शकतो. तसेच जसप्रीत बुमराहच्या जागी अन्य खेळाडूला संधी दिली जाऊ शकते. अय्यर बुमराहशीही चर्चा करून त्याला विश्रांती देऊ शकतो.

जपानविरुद्धचा सामना सानो इंटरनॅशनल स्टेडियमवर खेळला जाणार आहे. आकाश चोप्रांच्या मते, या खेळपट्टीवर फलंदाजांचे वर्चस्व राहू शकते आणि भरपूर धावा होण्याची शक्यता आहे. भारताने नाणेफेक जिंकून प्रथम फलंदाजी केली, तर मोठी धावसंख्या पाहायला मिळू शकते, असे त्यांनी म्हटले आहे.

जपानला रवाना होण्यापूर्वी भारतीय संघाने मायदेशात अफगाणिस्तानविरुद्ध तीन सामन्यांची टी-20 मालिका खेळली होती. मालिकेतील अखेरच्या सामन्यात अभिषेक शर्माने शानदार कामगिरी केली. त्याने अवघ्या 30 चेंडूंमध्ये शतक पूर्ण केले आणि आयसीसीच्या पूर्ण सदस्य देशांमधील खेळाडूंमध्ये सर्वात वेगवान शतक झळकावले. या मालिकेत त्याने एका शतकासह एक अर्धशतकही झळकावले.

वैभव सूर्यवंशीबद्दल बोलायचे झाल्यास, तोही या मालिकेसाठी भारतीय संघाचा भाग होता. मात्र, त्याला अंतिम संघात खेळण्याची संधी मिळाली नाही. तिन्ही सामन्यांच्या अंतिम संघातून तो बाहेर होता.

याशिवाय संजू सॅमसननेही (Sanju Samson) या मालिकेत सलामीवीर म्हणून शानदार कामगिरी केली. त्याने सलग दोन अर्धशतके झळकावली. त्यामुळे वैभवला संधी मिळत नव्हती. मात्र, आशियाई क्रीडा स्पर्धा 2026 मध्ये वैभवला संधी मिळण्याची शक्यता वर्तवली जात आहे.