हार्दिक पंड्याचा पर्याय म्हणून वनडे मालिकेत हे 3 खेळाडू शर्यतीत! गिल-गंभीर कोणाला देणार संधी?

सध्या भारतीय क्रिकेट संघातील अनेक प्रमुख खेळाडूंना वारंवार दुखापती होत आहेत. ऑस्ट्रेलिया ए विरुद्धच्या वनडे मालिकेतून स्टार अष्टपैलू खेळाडू हार्दिक पंड्या (Hardik pandya) पुनरागमन करणार होता. मात्र, आता त्याला पुन्हा दुखापत झाली आहे. त्यामुळे तो ऑस्ट्रेलिया ए विरुद्धच्या मालिकेतूनही बाहेर होऊ शकतो. याशिवाय, न्यूझीलंडविरुद्धच्या वनडे मालिकेलाही पंड्याला मुकावे लागू शकते. अशा परिस्थितीत वनडे संघात त्याची जागा कोणता खेळाडू घेऊ शकतो, हा मोठा प्रश्न आहे. सध्या या शर्यतीत तीन खेळाडू दिसत आहेत.

नितीशकुमार रेड्डी

वेस्ट इंडिजविरुद्धच्या वनडे मालिकेत नितीश कुमार रेड्डीनेच (Nitish Kumar Reddy) हार्दिक पंड्याची जागा घेतली आहे. त्यामुळे न्यूझीलंडविरुद्धच्या वनडे मालिकेतही तो या शर्यतीत आघाडीवर असू शकतो. मात्र, रेड्डीसमोर एक आव्हान आहे. न्यूझीलंडविरुद्धच्या कसोटी मालिकेमुळे तो काही वनडे सामने खेळू शकणार नाही. असे असले तरी, न्यूझीलंडविरुद्धच्या पाचपैकी तीन वनडे सामन्यांत रेड्डी खेळताना दिसू शकतो. पंड्यानंतर या शर्यतीत तो सध्या दुसऱ्या क्रमांकावर आहे.

शिवम दुबे

स्टार अष्टपैलू खेळाडू शिवम दुबेची (Shivam Dube) वनडे संघात पुन्हा एकदा निवड होऊ शकते. जर शेवटचे दोन वनडे सामने नितीश कुमार रेड्डी खेळला नाही, तर शिवम दुबेला मोठी संधी मिळू शकते. इंग्लंडविरुद्धच्या वनडे मालिकेतही दुबेला संधी मिळाली होती; मात्र त्याला त्याचा फायदा करून घेता आला नव्हता. आता न्यूझीलंडच्या खेळपट्ट्यांवर आपल्या गोलंदाजीची छाप पाडण्याचा शिवम दुबे प्रयत्न करेल. रेड्डीलाही वारंवार दुखापती होत असल्याने, संघ व्यवस्थापन त्याचा पर्यायही तयार करत आहे.

सुर्यांश शेडगे

याचबरोबर, उभरता अष्टपैलू खेळाडू सूर्यांश शेडगेचे (Suryansh Shedage) नावही या यादीत आहे. जर संघ व्यवस्थापनाने शिवम दुबेला केवळ टी-20 प्रकारातच संधी देण्याचा निर्णय घेतला, तर सूर्यांश शेडगेला वनडे संघात संधी मिळू शकते. इंडिया ए संघाकडून सूर्यांशने वनडे प्रकारात चांगली कामगिरी केली आहे. त्यामुळे वनडे संघात स्थान मिळवण्याच्या शर्यतीत त्याचेही नाव सध्या पुढे आहे.

आयसीसी वनडे विश्वचषकासाठी भारतीय संघाला चांगल्या अष्टपैलू खेळाडूंची गरज आहे, जे वेगवान गोलंदाजीही करू शकतील. त्यामुळे दक्षिण आफ्रिकेतील परिस्थितीत संघाचे संतुलन चांगले राहण्यास मदत होईल. मागील वनडे विश्वचषकात हार्दिक पंड्याला झालेल्या दुखापतीनंतर भारतीय संघाचे संतुलन बिघडलेले दिसून आले होते.