अजित आगरकरांचे पर्व संपले! ‘या’ दिवशी मिळणार भारताला नवा मुख्य निवडकर्ता, BCCI ने केलं कन्फर्म

भारतीय क्रिकेट नियामक मंडळाचे (BCCI) सचिव देवजित सैकिया यांनी बुधवारी (23 सप्टेंबर) सध्याचे निवड समिती अध्यक्ष अजित आगरकर यांच्याबाबत मोठी अपडेट दिली आहे. आगरकर यांचा कार्यकाळ लवकरच संपणार असल्याचे त्यांनी सांगितले आहे.

सैकिया यांनी आगरकर यांचा कार्यकाळ 4 ऑक्टोबर रोजी संपणार असल्याचे सांगितले आहे. तोपर्यंत मंडळाकडे पुरेसा वेळ असून पदाबाबतचा निर्णय त्यानंतरच घेतला जाईल, असेही त्यांनी स्पष्ट केले आहे.

आगरकर यांनी 18 सप्टेंबर रोजीच बीसीसीआयला कळवले होते की, त्यांना भारतीय पुरुष निवड समितीच्या अध्यक्षपदाचा कार्यकाळ वाढवायचा नाही. आगरकर हे या पदावर तीन वर्षांपासून कार्यरत होते, मात्र त्यांची मूदत वाढविण्यास रस दाखवला नाही. त्यांचा कार्यकाळ 4 ऑक्टोबर रोजी संपणार आहे आणि तोपर्यंत आपल्याकडे पुरेसा वेळ आहे, असे सैकिया यांनी पीटीआयला सांगितले आहे.

“4 ऑक्टोबरनंतर रिकाम्या होणाऱ्या पदाबाबत आम्ही निर्णय घेऊ. बीसीसीआयने कोणताही निर्णय घेतल्यावर , तो आम्ही सार्वजनिकरित्या जाहीर करू,” असे सैकिया यांनी म्हटले आहे.

जपानमध्ये सुरू असलेल्या 20 व्या आशियाई क्रीडा स्पर्धेत भारताच्या महिला क्रिकेटने सुवर्ण कामगिरी केली, भारतीय पुरुष संघही याची पुनरावृत्ती करेल अशी आशा सैकिया यांनी व्यक्त केली.

“आम्हाला खूप अभिमान वाटतो. देश महिलांच्या धमाकेदार विजयाचा आनंद साजरा करत आहेत. महिला संघाने खरोखरच अप्रतिम कामगिरी केली आहे, ” असे सैकिया म्हणाले आहेत.

“पुरुष संघाचे बोलायचे झाल्यास, आमची मोहिम 28 सप्टेंबरपासून सुरू होत आहे. तसेच अंतिम सामना 3 ऑक्टोबर रोजी आहे. आम्हाला आशा आहे की पुरुष संघही महिलांप्रमाणे कामगिरी करेल. यामुळे आपल्याला 3 ऑक्टोबरला पुन्हा एकदा आनंद साजरा करण्याची संधी मिळेल,” असेही सैकिया यांनी म्हटले आहे.

भारतीय पुरुष संघ या स्पर्धेत थेट उपांत्य फेरीचा सामना खेळणार आहे. तसेच भारताने मागील स्पर्धेत सुवर्ण पदकाची कामगिरी केली होती. ते कायम राखण्याचा पुरुष संघाचा प्रयत्न असणार आहे. (Ajit Agarkar’s tenure ends! India to get a new chief selector on ‘this’ day; BCCI confirms.)