कंपाऊंड तिरंदाजीत दुहेरी सुवर्ण; महिलांच्या अव्वल कामगिरीनंतर देशाच्या मिश्र संघाने जिंकले सुवर्णपदक

नागोया येथे सुरू असलेल्या आशियाई क्रीडा स्पर्धेत बुधवारी हिंदुस्थानच्या चिकीथा तानीपार्थी आणि साहिल जाधव या कंपाऊंड मिश्र तिरंदाजी जोडीने अतिशय चुरशीच्या शूट-ऑफमध्ये कोरियाचा पराभव करत सुवर्णपदक पटकावले आणि २०२८ च्या ऑलिम्पिकमधील आपले स्थानही पक्के केले. याच क्रीडा प्रकारात हिंदुस्थानच्या महिला संघानेही अव्वल स्थान मिळवल्यानंतर हा विजय साकारला गेला.

एका थरारक अंतिम सामन्यात चिकीथा आणि साहिल यांनी कमालीचा संयम दाखवत शूट-ऑफनंतर १५८-१५७ अशा फरकाने कोरियाच्या जंगयून पार्क आणि चोई युन ग्यू यांच्यावर विजय मिळवला.

उपांत्य फेरीत थायलंडचा १५६-१५५ असा पराभव करून या हिंदुस्थानी जोडीने सुवर्णपदकाच्या लढतीत प्रवेश केला होता.

त्याआधी, हिंदुस्थान महिला कंपाऊंड तिरंदाजी संघाने अप्रतिम कामगिरीचे प्रदर्शन करत चीनचा २३८-२३४ असा पराभव केला आणि जागतिक विक्रमाशी बरोबरी साधत आपले आशियाई क्रीडा स्पर्धेतील सुवर्णपदक कायम राखले.

ज्योती सुरेखा वेन्नम, चिकीथा आणि पृथिका प्रदीप यांनी महिलांच्या अंतिम सामन्यात वर्चस्व गाजवत पोडियमवर अव्वल स्थान मिळवले. ही कामगिरी करताना हिंदुस्थानींनी दक्षिण कोरियाच्या नावावर असलेल्या जागतिक विक्रमाशी बरोबरी केली. २०१४ च्या इंचिऑन आशियाई क्रीडा स्पर्धेत कोरियाने ही धावसंख्या गाठली होती.

वुनिअर, युए वांग आणि फांगयाओ वेई यांचा समावेश असलेल्या चीनच्या संघाने रौप्यपदक पटकावले, तर पार्क जंगयून, पार्क येरिन आणि कांग येओन्सो यांचा समावेश असलेल्या दक्षिण कोरियन संघाने चायनीज तैपेईचा पराभव करून कांस्यपदक जिंकले.

हिंदुस्थानी त्रिकुटाने अंतिम फेरीत आपला सर्वोत्तम खेळ दाखवत सलग अचूक १० गुणांचे वेध घेत पहिला सेट ६०-५८ असा जिंकला.

विद्यमान विजेत्यांनी आपला दबदबा कायम ठेवत दुसरा सेटही ६०-५८ असा जिंकून आघाडी वाढवली आणि अंतिम सेटमध्ये जाण्यापूर्वी १७८-१७६ अशी आपली स्थिती अधिक मजबूत केली.

दोन वेळा ९ गुणांचा वेध घेतल्यामुळे चीनचा संघ दबावाखाली विस्कळीत झाला, तर हिंदुस्थानने सर्वच्या सर्व सहा अचूक १० गुणांचा वेध घेत आणखी एक परिपूर्ण राऊंड नोंदवला. यासह त्यांनी केवळ आपले विजेतेपदच राखले नाही, तर जागतिक विक्रमाशी बरोबरीही केली.

गेल्या आवृत्तीत हिंदुस्थानने तिरंदाजीत पाच सुवर्णपदके जिंकली होती.