भिवंडीत मोठा ट्विस्ट,भाजपचे नगरसेवक फुटले; महापौरपदावरुन राजकीय कुरघोड्या, ऐनवेळी उमेदवार बदलला

ठाणे : भिवंडी महापालिका महापौरपदाच्या(Mayor) निवडणुकीला वेगळेच वळण मिळाले असून महापौरपदाच्या निवडणुकीच्या तोंडावरच भाजपने (BJP) आपला उमेदवार बदलला आहे. त्यानंतर, भाजपमध्ये दोन गट पडल्याने आता भिवंडी (Bhiwandi) महापालिकेत महापौर कोण होणार याची उत्सुकता सर्वांनाच लागली आहे. भाजपने यापूर्वी नारायण चौधरी यांना भाजपच्या महापौरपदाचे अधिकृत उमेदवार घोषित केले होते. नारायण चौधरी यांनी भाजपकडून महापौर पदासाठीचा आपला उमेदवारी अर्ज देखील दाखल केला आहे. मात्र, महापौरपदाच्या निवडणुकीला वेगळेच वळण लागले असून भाजपने ऐनवेळी महापौरपदाचा उमेदवार बदलला आहे. त्यामुळे, भाजप नगरसेवकांतच फूट पडल्याचं चित्र पाहायला मिळालं. भाजपचे 9 नगरसेवक फुटल्याची माहिती आहे.

भाजपचे भिवंडी शहराध्यक्ष रविकांत सावंत यांनी महापौर पदाच्या उमेदवार म्हणून स्नेहा मेहुल पाटील यांच्या नावाची घोषणा केली आहे. त्यासंदर्भातील लेखी पत्र भाजप शहराध्यक्षांनी भाजपच्या सर्व नगरसेवकांना दिले. तर, भाजपने आता स्नेहा मेहुल पाटील यांची महापौरपदाची अधिकृत उमेदवार म्हणून जाहीर केले आहे अशी प्रतिक्रिया भाजप शहराध्यक्ष रविकांत सावंत यांनी दिली आहे. त्यामुळे, नारायण चौधरी नाराज झाले असून त्यांनी काँग्रेससोबत जाण्याचा निर्णय घेतला. मला भाजपने महापौरपदाचा उमेदवार जाहीर केला होता. मात्र, महायुतीतील घटक पक्ष सोबत यायला तयार नव्हते, त्यांच्याशी अनेकवेळा मिटींग केल्या. मात्र घटक पक्ष सोबत येत नाही. त्यातच आज भाजपने स्नेहा मेहुल पाटील यांना महापौरपदाचे उमेदवार घोषित केले. त्यामुळे मी सेक्युलर सोबत जाणार, अशी प्रतिक्रिया नारायण चौधरी यांनी दिली होती. त्यानंतर, ते काँग्रेससोबत गेल्याने भिवंडी महापालिकेत चांगलंच सत्तानाट्य पाहायला मिळालं.

भिवंडीत भाजप नगरसेवकांत फूट

भिवंडीतल्या भाजपच्या नगरसेवकांमध्ये फाटाफूट झाली असून भाजपचा एक गट नारायण चौधरींच्या विरोधात गेला आहे. नारायण चौधरी काँग्रेससोबत गेल्यानं भाजपचा एक गट नाराज झाल्याची माहिती आहे. नारायण चौधरी हे भाजपचे अधिकृत महापौरपदाचे उमेदवार तर स्नेहा पाटील ह्या डमी उमेदवार असल्याचा आरोप करत नगरसेवकांमध्ये फूट पडल्याचं दिसून येत आहे.  तसेच, नारायण चौधरी यांची काँग्रेससोबत जाण्याची खेळी असल्याने भाजपचे नगरसेवक नाराज आहेत.

महायुतीकडे 34 नगरसेवक, भाजपचे 9 फुटले

भारतीय जनता पक्ष आणि शिवसेना यांच्या महायुतीकडे मिळून 34 नगरसेवक आहेत. बहुमतासाठी त्यांना कोणार्क विकास आघाडी, भिवंडी विकास आघाडी आणि समाजवादी पक्षाच्या मदतीची आवश्यकता आहे. हे सर्व घटक एकत्र आल्यास महायुती बहुमताचा आकडा गाठू शकते. मात्र, महायुतीतही महापौर पदावरून भाजप आणि शिवसेना यांच्यात मतभेद उफाळून आले आहेत. त्यामुळे आज दोन्ही पक्षांकडून स्वतंत्रपणे महापौर व उपमहापौर पदासाठी अर्ज दाखल केले जाण्याची शक्यता आहे.

भिवंडीत 90 पैकी कोणाला किती जागा? बहुमताचा आकडा 46

काँग्रेस – 30 जागा
भाजप – 22 जागा
राष्ट्रवादी काँग्रेस – 12 जागा
शिवसेना – 12 जागा
समाजवादी पक्ष – 6 जागा
कोणार्क विकास आघाडी – 4 जागा
भिवंडी विकास आघाडी – 3 जागा
अपक्ष – 1 जागा

आणखी वाचा