छगन भुजबळांचं थेट रुग्णालयातून भाषण, सलाईन लावून भावनिक आवाहन; म्हणाले, मला 5 वेळा निवडून दिलं
नाशिक : राज्यातील नगरपालिका आणि नगरपंचायत निवडणुकांचा (Election) प्रचार आता अंतिम टप्प्यात आला असून बहुतांश नेत्याकडून आजच जाहीर सभा घेतल्या जात आहेत. त्याच पार्श्वभूमीवर येवल्यातील नगरपालिका निवडणुकांसाठी महायुतीच्या उमेदवारांच्या प्रचारार्थ सभा संपन्न झाली. या सभेला राज्याचे कॅबिनेट मंत्री छगन भुजबळ (Chhagan bhujbal) यांनी व्हिडिओ कॉन्फरेन्सिंगच्या माध्यमातून संवाद साधला. विशेष म्हणजे छगन भुजबळ यांच्यावर ह्रदयशस्त्रक्रिया झाली असून त्यांनी मुंबईतील रुग्णालयातून आपलं भाषण केलं. महायुतीच्या उमेदवाराच्या प्रचारार्थ शनी पटांगण येवला (Nashik) येथे उपस्थित जनतेशी ऑनलाईनपणे संवाद साधत सभा केली. यावेळी, रुग्णालयातून त्यांनी हाताला सुई टोचली असतानाही हाती कागद घेऊन उपस्थितांशी संवाद साधत भावनिक आवाहन केलं. यावेळी, भुजबळ यांच्या चेहऱ्यावर थकवा आणि आजारपण स्पष्ट दिसत होते.
येवल्यातील महायुतीच्या प्रचारार्थ या सभेला माजी खासदार समीर भुजबळ, आमदार पंकज भुजबळ व मंत्री भुजबळ यांच्या पत्नी देखील उपस्थित होत्या. यावेळी बोलताना छगन भुजबळ म्हणाले की, माझी इच्छा असताना सुद्धा नगरपरिषद निवडणुकांमध्ये सहभाग घेता आला नाही. विकासाच्या मुद्द्यावर मी इथे आलो आणि विकासकामेही केली. 2004 मध्ये मला काम करण्याची, सेवा करण्याची संधी येवल्यात मिळाली. हजारो कोटी रुपयांची कामे मला करायला मिळाली, त्यासाठी आपली साथ होती. अनेक कामे मतदार संघात केली, म्हणून तुम्ही मला 5 वेळा निवडून दिले. आपल्या नगराध्यक्षपदाच्या उमेदवारासह सर्वच उमेदवारांना आपण निवडून द्याल, असे आवाहन भुजबळांनी रुग्णालयातून केले.
शिवसृष्टी, महात्मा फुले नाट्यगृह, मुक्तीभूमी, उपजिल्हा रुग्णालय, क्रीडा संकुल व इतर अनेक विकासकामे केली. प्रशासकीय सचिवालय, नगरपालिका कार्यालय, महापुरुषांचे पुतळे, स्मारके उभारली आहेत. मांजरपाडा काम फक्त आपण पूर्ण करू शकलो, येवला शहराला जोडणारे रस्ते कोट्यवधी रुपये खर्च करून चौपदरी रस्ता होत आहे. कोपरगाव, येवला, मनमाड रोड चौपदरीकरण सुरू आहे येवला बायपास आपण करत आहोत. येवल्यातील असंख्य कामे प्रगती पथावर आहेत. येथे पाण्याच्या प्रश्न गंभीर, आपण तो सोडवत आहोत. पाणी येऊ नये म्हणून काहींनी राजकारण केले, खोडा घातला. पण आपण प्रश्न सोडवला. शहराच्या सर्व भागात शुद्ध आणि स्वच्छ पाणी पुरवण्याचे कामे सुरुवात होतील, असे आश्वासन येवलेकरांना दिले.
महायुतीला मतदान करण्याचे आवाहन, शायरीतून टोलेबाजी
विस्थापित गाळ्यांचे प्रश्न लातूर पॅटर्न धर्तीवर सोडणार आहोत. आगामी काळात विकासकामे करणार आहोत त्याचा वचननामा आपल्याकडे पोहोचला आहे. 21 वर्षात येवल्याचे नेतृत्व केले, जमिनी लुबाडल्या नाही, पैसे बुडवले नाही, बँका बुडावल्या नाहीत. मी येवल्यात नसलो तरी समीर पंकज येवल्यात रात्रंदिवस काम करत आहेत. मला जे प्रेम दिले ते महायुतीच्या उमेदवारांना प्रेम द्या. घड्याळ आणि कमळ निशाणीवर उभे असलेल्यांना सहकार्य करा आणि निवडून द्या. संघर्ष की रात कितनी अंधेरी होती है सफलता का सुरज उतना ही तेज उगता है… अशी शायरीही भुजबळांनी यावेळी म्हटली. सवाल जहर का नही था वो तो मैं पी गया..तकलीफ तो लोगो को तब हुई के मैं आपके सामने खडा था.. असे म्हणत त्यांनी आपले भाषण संपवले.
हेही वाचा
आणखी वाचा
Comments are closed.