भारत आणि श्रीलंका यांच्यात गॉल आंतरराष्ट्रीय स्टेडियमवर खेळल्या जात असलेल्या पहिल्या कसोटीच्या पहिल्या दिवशी देवदत्त पडिक्कलने अप्रतिम कामगिरी केली. टीम इंडियासाठी तिसऱ्या क्रमांकावर फलंदाजीला आलेल्या देवदत्त पडिक्कलने ९ चौकार आणि एका षटकाराच्या मदतीने शतक झळकावले. कसोटी क्रिकेटमधील देवदत्त पडिक्कलचे हे पहिलेच शतक आहे. या शतकासह त्याने इतिहास रचला आहे.
श्रीलंकेविरुद्ध पहिल्या कसोटीत शतक झळकावून देवदत्त पडिक्कलने इतिहास रचला आहे. पडिक्कल २१ व्या शतकात भारतासाठी शतक ठोकणारा दुसरा डाव्या हाताचा फलंदाज ठरला आहे. सौरव गांगुलीने २००२ मध्ये दिल्लीत झिम्बाब्वेविरुद्ध १३६ धावा केल्या होत्या, त्यानंतर २१ व्या शतकात भारतासाठी तिसऱ्या क्रमांकावर फलंदाजी करताना कसोटी शतक झळकावणारा देवदत्त पडिक्कल हा दुसरा डाव्या हाताचा फलंदाज बनला आहे.
देवदत्त पडिक्कलचे हे शतक भारतासाठी आणखी एका कारणाने अत्यंत खास आहे. तिसऱ्या क्रमांकावर फलंदाजी करताना कसोटी शतक झळकावणारा शेवटचा भारतीय फलंदाज शुभमन गिल होता, ज्याने सप्टेंबर २०२४ मध्ये चेन्नईत बांगलादेशविरुद्ध ही कामगिरी केली होती. त्या सामन्या दरम्यान आणि सध्याच्या कसोटी दरम्यान खेळल्या गेलेल्या १९ कसोटी सामन्यांमध्ये भारताने तिसऱ्या क्रमांकावर सात वेगवेगळ्या फलंदाजांचा वापर केला होता.
यापूर्वी श्रीलंका इलेव्हनविरुद्धच्या सामन्यातही देवदत्त पडिक्कलने तिसऱ्या क्रमांकावर फलंदाजी करताना शानदार शतक झळकावले होते. तीन दिवसीय सराव सामन्यात देवदत्त पडिक्कल १६४ चेंडूंत १४२ धावांवर नाबाद राहिला होता.
गॉल येथे खेळल्या जात असलेल्या पहिल्या कसोटीत टीम इंडियाने नाणेफेक जिंकून प्रथम फलंदाजी करण्याचा निर्णय घेतला आहे. बातमी लिहीपर्यंत पावसामुळे सामना थांबलेला आहे. भारतीय संघाने आतापर्यंत दोन गडी गमावून २३९ धावा केल्या आहेत. देवदत्त पडिक्कल १४७ चेंडूंत १०७ धावांवर खेळत आहे. त्याने आतापर्यंत ९ चौकार आणि एक षटकार मारला आहे. त्याच्यासोबत ऋषभ पंत सात चेंडूंत तीन धावांवर खेळत आहे. यापूर्वी यशस्वी जायसवाल ३२ तर कर्णधार शुभमन गिल १६ धावा करून बाद झाले.
Comments are closed.