IPL 2026: त्याला दुसरा सचिन म्हणू नका.., आयपीएलमध्ये धमाका करणाऱ्या वैभव सूर्यवंशीबाबत या खेळाडूचं मोठं विधान

आयपीएल 2026 (IPL 2026) मध्ये राजस्थान रॉयल्सचा 15 वर्षांचा युवा फलंदाज वैभव सूर्यवंशी (Vaibhav Suryavanshi) आपल्या बॅटने धुमाकूळ घालत आहे. या हंगामात त्याने उत्कृष्ट फलंदाजी करत 550 हून अधिक धावा केल्या आहेत. वैभवची ही कामगिरी पाहून प्रत्येकजण त्याचे कौतुक करत आहे. वैभवला आता आंतरराष्ट्रीय पातळीवर खेळण्याची संधी मिळावी, अशी चाहत्यांची इच्छा आहे. दरम्यान, क्रिकेट तज्ज्ञ आणि चाहते सातत्याने वैभव सूर्यवंशीची तुलना सचिन तेंडुलकरशी करत आहेत. मात्र, भारताचा माजी क्रिकेटपटू आणि आरसीबीचा (RCB) फलंदाजी कोच दिनेश कार्तिकचे मत आहे की, सध्या कोणीही वैभवची तुलना सचिनशी करू नये.

‘क्वेस्ट टॉक पॉडकास्ट’च्या आगामी भागात बोलताना दिनेश कार्तिक म्हणाला, वैभव सध्या जे काही करत आहे ते अत्यंत खास आहे. पण लोकांनी त्याला ‘पुढचा सचिन’ म्हणावे असे मला वाटत नाही; कारण तो अवघ्या 15 वर्षांचा आहे आणि तो सध्या त्याचा खेळ एन्जॉय करतोय. सचिनने जे काही केले ते अद्भूत होते. वैभवसाठी येणाऱ्या काळात आव्हाने पूर्णपणे वेगळी असतील. सचिन समोर मैदानावर जितकी आव्हाने असायची, तितकीच मैदानाबाहेरही असायची. पण वैभवसमोर मैदानाबाहेरची आव्हाने नक्कीच जास्त असतील, कारण त्याच्याकडे उत्तम क्रिकेटिंग स्किल्स आहेत, जे खेळाव्यतिरिक्त समोर येणाऱ्या प्रत्येक परिस्थितीचा सामना करू शकतात.

वैभव सूर्यवंशी आयपीएल 2026 मध्ये आपल्या स्फोटक फलंदाजीने तहलका माजवत आहे. 13 सामन्यांच्या 13 डावांमध्ये वैभवने आतापर्यंत 237 च्या तुफानी स्ट्राईक रेटने 579 धावा ठोकल्या आहेत. सध्या तो ऑरेंज कॅपच्या (Orange Cap) शर्यतीत टॉप पाच फलंदाजांमध्ये सामील झाला आहे. तो एकट्या जीवावर राजस्थान रॉयल्सला प्ले-ऑफमध्ये (Playoffs) पोहोचवण्यासाठी पूर्ण प्रयत्न करत आहे. राजस्थानचा पुढचा सामना 24 मे रोजी मुंबई इंडियन्सविरुद्ध होणार आहे. हा सामना जिंकून प्ले-ऑफमधील आपले स्थान पक्के करण्याचा राजस्थानचा प्रयत्न असेल.

2008 मध्ये सुरुवात झाल्यापासून आयपीएलमध्ये खूप बदल झाले आहेत, असे दिनेश कार्तिकने सांगितले. ही जगातील सर्वात वेगाने वाढणारी लीग आहे, जी लोकांना एक चांगली जीवनशैली (Lifestyle) देत आहे. आता क्रिकेट खेळण्याचा निर्णय घेणाऱ्या कोणत्याही तरुण मुला किंवा मुलीसाठी आयपीएल हा एक उत्तम करिअरचा पर्याय बनला आहे.