Women's T20 WC 2026: सामना गमावल्यानंतर हरमनप्रीत कौरचा संताप अनावर; 'या' खेळाडूला अप्रत्यक्ष सुनावले

आयसीसी महिला टी-२० विश्वचषक २०२६ मध्ये दक्षिण आफ्रिकेविरुद्धच्या तिसऱ्या सामन्यात भारतीय संघाला पहिल्या पराभवाचा सामना करावा लागला. स्पर्धेतील संघाची विजयाची मालिका खंडित झाल्यानंतर कर्णधार हरमनप्रीत कौरने तीव्र निराशा व्यक्त केली. सामन्यानंतर बोलताना कौरने नमूद केले की, संघाला मिळालेल्या संधींचे सोने करता आले नाही. भारतीय क्षेत्ररक्षकांनी मारिझान कॅपला बाद करण्याची संधी गमावली. या जीवनदानाचा पुरेपूर फायदा घेत तिने ४५ चेंडूंत नाबाद ८१ धावांची खेळी केली, ज्यात सात चौकार आणि चार षटकारांचा समावेश होता आणि दक्षिण आफ्रिकेला पाच चेंडू शिल्लक असताना सहा गडी राखून विजय मिळवून दिला.

पर्यायी क्षेत्ररक्षक राधा यादवने कॅपचे दोन झेल सोडले. दक्षिण आफ्रिकेने १९.१ षटकांत ४ बाद १६१ धावा करत आपला दुसरा विजय नोंदवला. परिणामी, गुणतालिकेत चार गुणांसह तिसऱ्या स्थानावर झेप घेतली; भारताचेही चार गुण आहेत, परंतु दक्षिण आफ्रिका मागे आहे. कठीण आणि असमान उसळी असलेल्या खेळपट्टीवर फलंदाजी करताना, भारताने २० षटकांत ७ बाद १५८ धावा केल्या. यात दीप्ती शर्माच्या २९ आणि कर्णधार हरमनप्रीत कौरच्या २४ धावांचा मोलाचा वाटा होता. सलामीवीर शफाली वर्माने १५ चेंडूंत ३१ धावा केल्या.

“आम्हाला काही संधी मिळाल्या होत्या, पण आम्ही त्यांचा पुरेपूर फायदा घेऊ शकलो नाही,” असे हरमनप्रीतने सामन्यानंतर सांगितले. “तरीही, अजून दोन सामने बाकी आहेत आणि आम्ही अधिक चांगली कामगिरी करण्याचा प्रयत्न करू.” डावखऱ्या फिरकी गोलंदाज श्री चरणीने आपल्या चार षटकांच्या स्पेलमध्ये २४ धावा देत तीन बळी घेतले; यात एका ‘मेडन’ षटकाचाही समावेश होता.

“श्री चरणी आणि शेफाली यांनी चांगली गोलंदाजी केली, पण त्यांना क्षेत्ररक्षकांकडून फारशी साथ मिळाली नाही,” असे ती म्हणाली. हरमनप्रीत पुढे म्हणाली, “आम्ही नेहमीच चांगल्या क्षेत्ररक्षणाच्या गरजेबद्दल बोलतो. पण कॅपने आमच्या हातातून सामना हिरावून घेतला. तिने आम्हाला संधी दिल्या होत्या, तरीही आम्ही त्यांचा फायदा घेऊ शकलो नाही.”