कसोटी क्रमवारीत टीम इंडियाला मोठा फायदा! इंग्लंडला मागे टाकत या स्थानावर झेप

आंतरराष्ट्रीय क्रिकेट परिषद म्हणजेच आयसीसीकडून 1 मे रोजी वार्षिक कसोटी संघ क्रमवारीचे (Test Team Ranking) अपडेट जाहीर करण्यात आले, ज्यामध्ये खूप मोठा फेरबदल पाहायला मिळाला नाही, परंतु भारतीय संघाला नक्कीच फायदा झाला आहे. भारतीय संघाची कसोटी क्रिकेटमधील गेल्या एक वर्षातील कामगिरी फारशी चांगली राहिलेली नाही, तरीही क्रमवारीत सुधारणा करण्यात संघ यशस्वी ठरला आहे. भारतीय संघाव्यतिरिक्त पाकिस्तानच्या कसोटी क्रमवारीतही सुधारणा झाली आहे. आयसीसीने जाहीर केलेल्या कसोटी संघ क्रमवारीत ऑस्ट्रेलियन संघाचे पहिले स्थान कायम आहे.

​आयसीसीकडून जाहीर करण्यात आलेल्या वार्षिक कसोटी संघ क्रमवारीत भारतीय संघाला एका स्थानाचा फायदा झाला आहे. भारतीय संघ जो आधी चौथ्या क्रमांकावर होता, तो आता 104 रेटिंग पॉइंट्ससह तिसऱ्या क्रमांकावर पोहोचला आहे. पहिल्या क्रमांकावर असलेल्या ऑस्ट्रेलियन संघाचे 131 रेटिंग पॉइंट्स आहेत, तर दुसऱ्या क्रमांकावर दक्षिण आफ्रिका आहे, जो सध्याचा जागतिक कसोटी चॅम्पियनशिप (WTC) विजेता संघ आहे. आफ्रिकन संघाचे 119 रेटिंग पॉइंट्स आहेत. आयसीसी कसोटी संघ क्रमवारीत आता इंग्लंडचा संघ चौथ्या क्रमांकावर आहे, ज्यांचे गेल्या एक वर्षातील प्रदर्शन खूपच खराब राहिले आहे. इंग्लंडचे एका स्थानाने नुकसान झाले असून त्यांचे एकूण 102 रेटिंग पॉइंट्स आहेत.

​आयसीसीने जारी केलेल्या वार्षिक कसोटी क्रमवारीत इतर संघांची स्थिती पाहिल्यास, 101 रेटिंग पॉइंट्ससह न्यूझीलंडचा संघ पाचव्या क्रमांकावर आहे, तर आता पाकिस्तानचा संघ सहाव्या क्रमांकावर आला आहे, ज्यांना एका स्थानाचा फायदा झाला आहे. पाकिस्तान संघाचे एकूण 89 रेटिंग पॉइंट्स आहेत. श्रीलंका संघाचे एका स्थानाने नुकसान झाले असून ते 86 रेटिंग पॉइंट्ससह 7 व्या क्रमांकावर आहेत, तर वेस्ट इंडिज 68 रेटिंग पॉइंट्ससह 8 व्या क्रमांकावर आणि बांगलादेशचा संघ 67 रेटिंग पॉइंट्ससह 9 व्या क्रमांकावर आहे. 10 व्या क्रमांकावर आयर्लंडचा संघ असून त्यांचे एकूण 25 रेटिंग पॉइंट्स आहेत.